საპრეზიდენტო კანდიდატები საერთაშორისო დამკვირველბლებს შეხვდნენ. გაერთიანებული ოპოზიციის „ძალა ერთობაშიას“ საპრეზიდენტო კანდიდატმა გრიგოლ ვაშაძემ შეხვედრის დასრულების შემდეგ განაცხადა, რომ საერთაშორისო ორგანიზაციების დამკვირვებლებმა უნდა უზრუნველყონ, რომ საქართველოში საპრეზიდენტო არჩევნები მაქსიმალურად პატიოსნად და საერთაშორისო სტანდარტების დაცვით ჩატარდეს:

„საერთაშორისო ორგანიზაციების დამკვირვებლებმა უნდა უზრუნველყონ, რომ საქართველოში საპრეზიდენტო არჩევნები მაქსიმალურად პატიოსნად და საერთაშორისო სტანდარტების დაცვით ჩატარდეს. ე.წ. ქართული ოცნების ხელისუფლების პირობებში ეს ძნელი განსახორციელებელია, მაგრამ მაქსიმალურად უნდა ვეცადოთ, რომ ამ ხალხმა ობიექტური ინფორმაცია მიიღოს, როგორ ჩაიარა წინასაარჩევნო კამპანიამ, რამდენად არათანაბარი იყო პირობები, რამდენად არათანაბარი იყო დაფინანსება. როგორ არის ბიზნესი დაშინებული, რომ მხარი არ დაუჭიროს გაერთიანებულ ოპოზიციას. როგორ არიან მოქალაქეები დაშინებული, რომ თავისი აზრი არ გამოხატონ და რაც ყველაზე მთავარია, რამდენი ხანია, გაერთიანებული ოპოზიცია ცესკო-დან ითხოვს ამომრჩევლების სიას. ამაზე დიდი აბსურდი, იმ აბსურდისტანში სადაც ვცხოვრობთ, არ გამიგია.

ცესკო უარს ეუბნება 11 პოლიტიკურ პარტიას, რომ მისცეს ამომრჩევლების სია. ეს არის ე.წ. ქართული ოცნებისა და ივანიშვილის საოცარი დემოკრატია, რომელიც ყვავის, იფურჩქნება და, რომელშიც სამწუხაროდ, გვიწევს ცხოვრება“, – განაცხადა გრიგოლ ვაშაძემ.