9 წლის გოგონას სასტიკ მკვლელობაში ბრალდებული, რომელმაც ციხე ვადაზე ადრე დატოვა - იაგო ნებიერიძე ჯერ ამნისტირებულთა, ხოლო შემდეგ შეწყალებულთა სიაში იყო

პოლიტიკა - 22:05, 26 Oct, 2018

3073

9 წლის გოგონას სასტიკ მკვლელობაში ბრალდებული იაგო ნებიერიძე, რომელიც 2004 წელს სასჯელს ყაჩაღობის მუხლით იხდიდა, ციხე ცხრა თვის წინ დატოვა. მას ყაჩაღობის ბრალდებით სასამართლომ 17 წლით თავისუფლების აღკვეთა მიუსაჯა. თუმცა, ჩვენი ინფორმაციით, ნებიერიძეს ამნისტირებულთა სიაში აღმოჩნდა, რითაც მას სასჯელი რამდენიმე წლით შეუმცრიდა და გარკვეულ ნაწილში პრეზიდენტის შეწყალებაც შეეხო.

გორში მომხდარი სასტიკი მკვლელობის ბრალდებით 33 წლის იაგო ნებიერიძე დააკავეს. ამ დრომდე უცნობია აღიარებს თუ არა დანაშაულს უმძიმეს დანაშაულში ბრალდებული.

როგორც „ნიუპოსტს“ განუცხადეს, საქმეში დევს ახალგაზრდა მამაკაცის კუთვნილი მობილური ტელეფონი, რომელშიც სხვა არასრულწლოვანი ბავშვების ფოტოებთან ერთად მოკლული ნანა ბერიაშვილის სურათებიც იპოვეს. ახლობლები ეჭვობენ, რომ ნებიერიძე გოგონას უთვალთვალებდა.

როგორც ითქვა, სასტიკ მკვლელობაში ბრალდებული წარსულში ნასამართლევია. მისმა სახელმა პირველად 8 წლის წინ გაიჟღერა. მაშინ ეს უკანასკნელი ყაჩაღობის ბრალდებით დააკავეს. ამასთან, ნებიერიძეს ქალის მიმართ განხორციელებულ ძალადობას ედავებოდნენ. მან საპატიმრო სულ რაღაც 9 თვის წინ დატოვა.

ამასთან, "ნიუპოსტისთვის" ცნობილი გახდა, რომ იაგო ნებიერიძის სახელი გახმაურებულ გატაცებას უკავშირდება, როცა 2004 წელს, გამოსასყიდის მოთხოვნის მიზნით, 11 წლის ბიჭი იმ სახლიდან გაიტაცა სადაც მამამისი მუშაობდა. როგორც ირკვევა, 11 წლის მოზარდი ამ დრომდე არ არის ნაპოვნი.

აღსანიშნავია, რომ მაშინ გორის რაიონულმა სასამართლომ ნებიერიძე თავისუფლების უკანონო აღკვეთაში გაამართლა. ბრალდებული მხოლოდ თანხის გამოძალვისთვის მიეცა პასუხისგებაში.