"ახლოვდება დიდი ელექტორალური ტალღა, რომელიც წალეკავს ივანიშვილის ყველა გეგმას და ხრიკს"- სააკაშვილი

პოლიტიკა - 17:05, 25 Oct, 2018

1082

Edison Research-ის კვლევის შედეგებს, რომლის მონაცემებიც დღეს გასაჯაროვდა საქართველოს მესამე პრეზიდენტი ეხმაურება, მიხეილ სააკაშვილის თქმით შედეგები აჩვენებს, რომ გაერთიანებული ოპოზიცია-„ძალა ერთობაშიას“ საპრეზიდენტო კანდიდატი უპირობო ლიდერია და ის აუცილებლად გაიმარჯვებს. ამის შესახებ სააკაშვილმა ფეისბუკზე გავრცელებულ ვიდეომიმართვაში ისაუბრა

„რაც შეეხება საპრეზიდენტო არჩევნების წინასწარი გამოკითხვის შედეგებს, ეს არის ძალიან მაგარი მონაცემები, იმიტომ რომ, იმ ხალხის გასაგონად მინდა ვუთხრა, ვისაც სალომე ზურაბიშვილის 30-32% აღელვებს, აქ მესამედია თითქმის მყარი ბაზა იდეური ქოცების, დანარჩენი ესაა სახელმწიფო მოხელეები, რომელთაც ეშინიათ თქმა რომ ხმას არ აძლევენ სალომე ზურაბიშვილს. საქმე საქმეზე, რომ მიდგება არ მიცემენ ხმას და მოგვცემენ ჩვენ. ვაშაძე დამაჯერებლად ლიდერობს და რომ დაუმატო ასევე ბაქრაძის ხმები, რომელიც გარდაუვლად აქეთ გადმოვა, იმიტომ რომ ამ ეტაპზე ბაქრაძისთვის ხმის მიცემა შეიძლება დაკარგულად ჩაითვალოს, როცა ვაშაძეა აშკარად პირველ ადგილზე. ეს ხმები ერთად არის აბსოლუტური უმეტესობა და ეს ნიშნავს იმას, რომ ახლოვდება ის დიდი ელექტორალური ტალღა,რომელიც გადაფარავს მათ ყველა გაყალბების მექანიზმს, რომელიც აუცილებლად წალეკავს ივანიშვილის ყველა გეგმას და ხრიკს ქართველი ხალხის წინააღმდეგ. ქართველხალხს ძალიან უჭირს, პურის ფული არ აქვს და ფქვილი გამოაქვს ნისიად მაღაზიებიდან. ეს ისეთი ტალღაა, რომელიც აუცილებლად გაიმარჯვებს, ზუსტად ისე როგორც ვერ გააყალბეს მალაიზიაში ბევრად უფრო ძლიერმა ოლიგარქებმა, უკრაინაში თავის დროზე, საქართველოშიც თავის დროზე, სულ ახლახან მეზობელ სომხეთში. საქართველოშიც ქართველი ხალხი უბრალოდ განწირულია გამარჯვებისთვის 28 ოქტომბერს. ყველაფერი კარგად იქნება.“- გაანცხადა მიხეილ სააკაშვილმა.