"სუფსაში ხდება ნარკოტიკების შემოტანა და ამომრჩევლების კრიმინალებით დაშინება - ივანიშვილები ლანჩხუთზე კონტროლის აღებას ცდილობენ"

პოლიტიკა - 12:23, 25 Oct, 2018

1635

ამ წუთებში "ნაციონალური მოძრაობის" ოზურგეთის ორგანიზაციაში ბრიფინგს მართავს პარტიიდან ლანჩხუთის საკრებულოს დეპუტატი, კახა ასკურავა, რომელიც წინასაარჩევნოდ სუფსაში ადიკო ივანიშვილის ძმისშვილისა და ე.წ. კრიმინალური ავტორიტეტების მხრიდან ამომრჩევლების დაშინებაზე საუბრობს. ასკურავას თქმით, ემზარ ივანიშვილს შემოაქვს ასევე ნარკოტიკული ნივთიერებები და ამით ცდილობს არჩევნების დღეს ამომრჩეველზე გავლენას.

ასკურავა მოუწოდებს ლანჩხუთის მერს არჩევნებამდე თანამდებობიდან გაათავისუფლოს სუფსაში მისი წარმომადგენელი და თანაშემწე, რომლებიც, ასკურავას თქმით, ივანიშვილთან დაახლოებული პირები არიან:

"ბიძინა ივანიშვილის ოჯახის წარმომადგენელი, ემზარ ივანიშვილი უშუალოდ კურირებს სუფსას, რომელსაც ამომრჩევლების დაშინების მიზნით შემოკრებილი ჰყავს კრიმინალები. ასევე, სუფსაში მათ შემოაქვთ დიდი ოდენობით ნარკოტიკული საშუალებები, რითიც უნდათ გავლენა მოიპოვონ ამომრჩევლების ნაწილზე. სასწრაფოდ მოვითხოვ ლანჩხუთის მერისგან, რომ თანამდებობიდან გადააყენოს სუფლაში მისი წარმომადგენელი და თანაშემწე, რადგან ისინი არიან ემზარ ივანიშვილთან დაახლოებული პირები. სუფსაში უპირობოდ იგებს გრიგოლ ვაშაძე და სწორედ ამის გამო გააქტიურდა ივანიშვილი და ის ცდილობს თემში შემავალი სხვა სოფლებიც მთლიანად მოიცვას ამ დაშინებებით და ნარკოტიკებით"-განაცხადა ასკურავამ.