ბიძინა ივანიშვილი ჟურნალისტებთან მორიგ შეხვედრას აანონსებს და "რუსთავი 2"-ს ხელმეორედ იწვევს

პოლიტიკა - 19:06, 24 Oct, 2018

6921

26 ოქტომბერს ბიძინა ივანიშვილი ტელევიზიის ჟურნალისტებთან მორიგ შეხვედრას გამართავს. როგორც „ქართული ოცნების“ პრესამსახურში აცხადებენ, ამჯერად პარტიის თავმჯდომარესთან კითხვების დასმის საშუალება ექნებათ “მაესტროს”, “ობიექტივის”, “პალიტრა NEWS”, “კავკასიის” და “იბერია TV”-ს ჟურნალისტებს.

აქვე, პრესამსახურში აცხადებენ, რომ ბიძინა ივანიშვილი 26 ოქტომბრის შეხვედრაზე ხელმეორედ იწვევს რუსთავი 2-ს, რადგან, როგორც ეს განცხადებაშია აღნიშნული, ივანიშვილის მოწოდება განხვავებული აზრის პატივისცემისკენ „ტელეკომპანია რუსთავი2-ის მიერ შეფასებული იქნა როგორც მუქარა და სარედაქციო პოლიტიკაში უხეში ჩარევის მცდელობა“.

„მოქალაქეთა პოლიტიკური გაერთიანება “ქართული ოცნება - დემოკრატიული საქართველოს” თავმჯდომარე ბიძინა ივანიშვილი განაგრძობს მედიის წარმომადგენლებთან შეხვედრებს, რომლის ფარგლებშიც 26 ოქტომბერს, 11:00 სთ-ზე, იწვევს საქართველოში მოქმედი საერთო ეროვნული მაუწყებლების წარმომადგენლებს:

“მაესტრო”, “ობიექტივი”, “პალიტრა NEWS”, “კავკასია”, “იბერია TV”.

ამასთან, საზოგადოებას შევახსენებთ, რომ ბიძინა ივანიშვილის მოწოდება მინიმალური მედია სტანდარტის დაცვისა და განსხვავებული აზრის პატივისცემისკენ, ტელეკომპანია რუსთავი2-ის მიერ შეფასებული იქნა როგორც მუქარა და სარედაქციო პოლიტიკაში უხეში ჩარევის მცდელობა.

სწორედ ამიტომ, პარტიის თავმჯდომარე რუსთავი2-ს 26 ოქტომბერს დაგეგმილ შეხვედრაზეც იწვევს, რათა ამ ტელევიზიას მიეცეს საშუალება, ნებისიერ თემაზე დასვას კითხვები და შეასრულოს განსხვავებული აზრის საკუთარ მაყურებლამდე მიტანის ვალდებულება.

ინტერვიუს საერთო სიგნალს პარტია „ქართული ოცნება - დემოკრატიული საქართველოს“ უზრუნველყოფს და პირდაპირ რეჟიმში ყველა დაინტერსებულ მედიასაშუალებას მიაწვდის. ბიძინა ივანიშვილი მედიასთან შეხვედრებს სხვადასხვა ფორმატში მომავალშიც განაგრძობს.“ - ნათქვამია „ქართული ოცნების“ პრესამსახურის განცხადებაში.

შეხვედრა გაიმართება ტექნო პარკში, მისამართი: ქ.თბილისი, ინოვაციების ქ.#7