საქართველოს პრეზიდენტმა გიორგი მარგველაშვილმა „რადიო თავისუფლების“ ეთერში, გოგი გახარიას გადაცემაში „ანარეკლები“ პრეზიდენტის სასახლეზე ისაუბრა.

ქვეყნის პირველი პირის შეფასებით, "პრეზიდენტის სასახლემ 5 წლის გატარების შემდეგ შეიძინა სიმბოლიკა, რომ აქ ყველა ერთი ადამიანის ჭკუაზე არ დადის".

„თავიდან უარს ვამბობდი ამ სასახლეში გადმოსვლაზე. თუმცა, ეს არ იყო წინასაარჩევნო დაპირება. წინასაარჩევნო დაპირებაა, მაგალითად უფასო ფული გექნება, გაზი დაიკლებს, ბენზინიდან ლარი აღარ წავა „ნაცების“ ჯიბეში და წინასაარჩევნო დაპირებაა სამუშაო ადგილების შექმნა. ეს არ იყო წინასაარჩევნო დაპირება, ეს იყო ჩემი შეხედულების გაზიარება, რომ მე არ მინდა. არ მიმღებლობა გამომდინარე იყო იქედან, რომ ჩემთვის მიუღებელი იყო წინა პრეზიდენტი. ეს იყო საფუძველი არ მიღების.

მაგრამ არჩევნების შემდეგ ნათლად გამოჩნდა, რომ ჩვენი, ჩემი და მმართველი კოალიციის გზები გაყოფილია. ბევრი პერსონაჟი იყო შიგნით და რა თქმა უნდა მთავარი როლი ბიძინა ივანიშვილს ჰქონდა. არჩევნების შემდეგ ეგრევე გაიყო ჩვენი გზები"- თქვა მარგველაშვილმა.

ქვეყნის პირველი პირის განცხადებით, ამ გაყოფას სჭირდებოდა პოლიტიკური სიმბოლო.

"ეს ყველაფერი მიმდინარეობდა კულისებში და საჭირო იყო ჟესტი, რომ მე არ ვარ ის ადამიანი, ვისაც ეტყვიან „მესტა“ და სადაც ეტყვიან იქ დაჯდება ან დაწვება. ყველა აქტორთან მიდიოდა ჩემი დისკრედიტაცია და მე ამას წყნარად ვითმენდი.

აქ გადმოსვლამ ნათლად აჩვენა, რომ ეს არ არის ის, ვინც ემორჩილება. ამაზე წამოვიდა აგრესია, რომ ჩვენ ყველანი ვართ მორჩილებაში და შენ რა უფლება გაქვს არ დაემორჩილო"- განაცხადა გიორგი მარგველაშვილმა.