„კანონიერი შენება არ არის დანაშაული" - სესიაშვილი მისი ფეშენებელური სახლის ისტორიას ჰყვება

პოლიტიკა - 23:19, 22 Oct, 2018

5971

უმრავლესობის წევრი ირაკლი სესიაშვილი ფეშენებელურ სახლებთან დაკავშირებით რუსთავი 2-ზე გასულ სიუჟეტს ეხმაურება და ამბობს, რომ "რუსთავი 2"-მა მოიტყუა, როდესაც ითქვა, რომ 2012 წლის შემდეგ აქვს აშენებული სახლები. დეპუტატი აცხადებს, რომ სიუჟეტში არ იყო მითითებული ის, რომ ერთი სახლი აშენებული იყო2012 წლამდე, ხოლო მეორე 2012 წლის შემდეგ.

სესიაშვილი ამბობს, რომ მან კუთვნილი ბინა გაყიდა და ამ სახსრებით ააშენა სახლი. კითხვაზე, რომ დეკლარაციაში ბინის გაყიდვის თარიღად მითითებული აქვს 2017 წელი, ირაკლი სესიაშვილი აცხადებს, რომ 2016 წელს მან კი დაიწყო სახლის აშენება, თუმცა ეს იყო შავი კარკასი, რომლის თანხა მაშინ არ გადაუხდია, სესიაშვილი აცხადებს, რომ მას შავი კარკასი დაუჯდა 37 ათასი დოლარი, რომელის სწორედ ბინის გაყიდვიდან მიღებული თანხა იყო.
„კანონიერი შენება არ არის დანაშაული. დანაშაული არის უკანონო შემოსავლებით შენება. ეკო მაღრაძე, რომ დაინტერესებულიყო და თითოეული იმ რესპოდენტისთვის, რომ ეკითხა საიდან ააშენეს ეს სახლები, ის პასუხს მიიღებდა. აბსოლუტურად ყველა ვინც თქვენ დაასახელეთ, თითოეულ მათგანს აქვს კრედიტი არსებული ან ბინა გაყიდული როგორც ჩემს შემთხვევაში,“-განაცხადა ირაკლი სესიაშვილმა.
ქართული ოცნების დეპუტატი ამბობს, რომ რუსთავი 2 ცდილობს მოქალაქეებს შეუქმნას არასწორი შთაბეჭდილება. მისი თქმით, თავად რუსთავი 2-ია კორუფციული გზით შეძენილი.
"თქვენს გარემოცვას გადახედეთ, მე და ჩემს კოლეგებს არაფერი მოგვიპარია. დიდი განსხვავებაა ივანიშვილის ქველმოქმედებასა და სააკაშვილის ძალმომრეობას შორის" - განაცხადა სესიაშვილმა.
რაც შეეხება მიწას, რომელზეც განთავსებულია ირაკლი სესიაშვილის ფეშენებელური სახლი, თავდაცვის კომიტეტის თავმჯდომარე აცხადებს, რომ ის შეიძინა 2007 წელს. მისი თქმით მიწის მდებარეობიდან გამომდინარე მხოლოდ ორ მეზობელს შეეძლო შეძენა და ერთ-ერთი იყო თავად. მისი თქმით, მისმა მეზობელმა არ მიიღო მონაწილეობა აუქციონში და შესაბამისად დამატებითი ფართი თავად შემოიერთა.