საქართველოს ეკონომიკისა და მდგრადი განვითარების სამინისტროს სსიპ ,,საქართველოს სახელმწიფო ჰიდროგრაფიულ სამსახურში" საერთაშორისო ჰიდროგრაფიული ორგანიზაციის (IHO) ტექნიკურ ექსპერტთა გეგმიური ვიზიტი შედგა. ვიზიტის ფარგლებში საერთაშორისო სტანდარტებისა და რეგულაციების შესაბამისობაზე გადამოწმებულ იქნა ჰიდროგრაფიული სამსახურის საქმიანობა შემდეგი მიმართულებებით: ბათიმეტრიული კვლევები, კარტოგრაფია-ქაღალდის და ელექტრონული საზღვაო რუკების წარმოება, გემების მეტეოროლოგიური მონაცემებით მომსახურება და სანავიგაციო გაფრთხილებები (NAVTEX), სამსახურის ტექნიკური აღჭურვილობა და პერსონალის კვალიფიკაცია.

ექსპერტთა პირველადი შეფასებით საქართველოს სახელმწიფო ჰიდროგრაფიული სამსახური სრულად უზრუნველყოფს რეგიონში, კერძოდ საქართველოს საზღვაო პასუხისმგებლობის ზონაში საერთაშორისო ჰიდროგრაფიული ორგანიზაციის (IHO) რეგულაციების და სტანდარტების დაცვას და ზღვაზე ადამიანის სიცოცხლის დაცვის საერთაშორისო კონვენციის და SOLAS-74-ის მოთხოვნების შესრულებას.

უახლოეს მომავალში საერთაშორისო ჰიდროგრაფიული ორგანიზაცია ოფიციალურად წარმოადგენს ექსპერტთა დასკვნას ზემოთაღნიშნულ საკითხებთან დაკავშირებით.