ჰააგის სასამართლოში რუსეთის ფედერაცია საქართველოს წინააღმდეგ სალომე ზურაბიშვილის ციტატებს არგუმენტებად მოიყვანს - ამის შესახებ დღეს „ევროპული საქართველოს“ საპრეზიდენტო კანდიდატმა, დავით ბაქრაძემ განაცხადა, რომელსაც ირაკლი კობახიძემ უპასუხა და აღნიშნულ ინფორმაციას ტყუილი უწოდა.

„საარჩევნო გარემო ჩვენ არავის არ მოგვწონს, არავის არ მოგვწონს ის, თუ როგორ წარმართავენ ოპოზიციური კანდიდატები ამ საარჩევნო კამპანიას. ეს კამპანია წარიმართება მუდმივი აგრესიის, შეურაცხყოფის რეჟიმში. ეს არის ძალიან სამწუხარო მოვლენა. ეს ხელს არ შეუწყობს, ნამდვილად, პოლიტიკური კულტურის, საარჩევნო კულტურის განვითარებას. საპირისპირო მაგალითს იძლევა სალომე ზურაბიშვილი, რომელმაც წარმართა ეს კამპანია ევროპულ სტილში და ნამდვილად, ეს არის ის ნაბიჯი, რომელიც ხელს შეუწყობს, თავის წვლილს შეიტანს ჩვენთან საარჩევნო კულტურის განვითარებაში. ამისთვის, მე მას პირადად მინდა განსაკუთრებული მადლობა გადავუხადო, რაც შეეხება ჰააგის თემას, ეს არის ტყუილი და ამას მტკიცებულებით დავადასტურებთ”, - განაცხადა პარლამენტის თავმჯდომარემ.