სკანდალური ჩანაწერები - ოპოზიცია ძალოვანი უწყებების ხელმძღვანელებს პარლამენტში იბარებს

პოლიტიკა - 09:40, 22 Oct, 2018

1196

ბოლო დღეებში გავრცელებული სკანდალური ჩანაწერები - „ევროპული საქართველო“ ძალოვანი მინისტრების პარლამენტში მისვლას კიდევ ერთხელ მოითხოვს.

„ჩანაწერებით დასტურდება, ის რთული და მძიმე მდგომარეობა, რომელიც სახელისუფლებო წრეებში არის. განსაკუთრებით გარკვეულ უწყებებში. შესაბამისად ალბათ ბიუროს სხდომაზე დაისმება საკითხი, რომ შესაბამისი უწყებების ხელმძღვანელები, პასუხისმგებელი პირები მოვიდნენ პარლამენტში,“-ამბობს გიგი წერეთელი.

საგანგებო სხდომის ჩატარების აუცილებლობაზე საუბრობს ნაციონალური მოძრაობა.

„პარლამენტი უნდა შეიკრიბოს საგანგებო სხდომაზე და ამ ყველაფერზე იმსჯელოს თუ ამ ქვეყანას ელემენტარულად, ფორმალურად მაინც პარლამენტი ჰყავს, თუმცა ცხადია ეს არანაირ შედეგს არ გამოიღებს იმიტომ, რომ უდიდესი ნაწილი დამონებულია ივანიშვილთან, მაგრამ ეს მაინც რომ მოხდეს რომ პარლამენტი შეიკრიბოს და ამ ვითარებაზე, რაც ქვეყანაშია ვიმსჯელოთ ეს იქნებოდა სწორი,“-აცხადებს გიორგი ბარამიძე.

მმართველ გუნდში ჯერ ფარული ჩანაწერების ავთენტურობის დადგენას ელოდებიან.

„ოპოზიციის მიზანი განსაკუთრებით წინასაარჩევნოდ, ურთულესი ბრძოლა მიმდინარეობს საზოგადოებისთვის არის ცნობილი, არის, რომ ჩვენი საზოგადოების მთავარი საზრუნავი და მთავარი აქცენტები იყოს გადატანილი ფარულ ჩანაწერებზე. მე ვფიქრობ, რომ ავთენტურობის დადასტურება ბუნებრივია არის უმთავრესი ნებისმიერ ჩანაწერთან დაკავშირებით, მაგრამ ჩვენი საზოგადოების მთავარ საზრუნავად ნამდვილად ვერ დავტოვებთ ფარულ ჩანაწერებს,“-აცხადებს მარიამ ჯაში.