აღნიშნული პროცესი ამ დროისათვის მიმდინარეობს. მასალების განადგურების პროცედურის დაწყებამდე საქართველოს შინაგან საქმეთა მინისტრმა, ირაკლი ღარიბაშვილმა კომენტარი გააკეთა და აღნიშნა, რომ სამეგრელოში აღმოჩენილი ვიდეო და აუდიო მასალა დღეს არ განადგურდება:

"კომისიამ დაასრულა მუშაობა პირადი ცხოვრების ამსახველი მასალების განადგურებასთან დაკავშირებით. მსურს შეგახსენოთ, რომ თვეების განმავლობაში შსს-მ აღმოაჩინა რამდენიმე ათასი უკანონოდ მოპოვებული ვიდეო და აუდიო მასალა, ჯამში ამ მასალებმა 36 ათასი შეადგინა. ჩვენ გამოვყავით პირადი ცხოვრების ამსახველი ვიდეო და აუდიო მასალა, ჯამში 184 ფაილი. იყო აზრთა სხვადასხვაობა, მაგრამ კომისიის უმრავლესობამ და მთავრობამ მიიღო გადაწყვეტილება რომ განადგურდეს ეს მასალა. ჩვენ კონსულტაციები გავიარეთ უცხოელ პარტნიორებთან და კოლეგებთან, მივიღეთ მათგან რეკომენდაცია, რომ ეს მასალები უნდა განადგურდეს. ჩვენ დღეს ვანადგურებთ აღნიშნულ ფაილებს.

მოსახლეობის დიდი ნაწილი შეშფოთებას გამოთქვამდა იმასთან დაკავშირებით, რომ არ უნდა განადგურდებულიყო ეს მასალა, ჩვენ არ ვანადგურებთ ყველა იმ მასალას რომელიც დავაგროვეთ უკანასკნელი თვეების განმავლობაში, ვგულისხმობ 36 ათას მასალას, რომელიც გამოვყავით.

ჩვენ აღმოვაჩინეთ, რომ წლების განმავლობაში ხდებოდა ამ მასალების უკანონოდ მოპოვება. ამიტომ პირველ ეტაპზე უნდა მოხდეს ამ მრავალწლიანი ნეგატიური გამოცდილების შეფასება, ამის შემდეგ საჭირო იქნება გამოძიების დაწყება, მე მსურს შეგახსენოთ, რომ სამეგრელოში აღმოვაჩინეთ დიდი რაოდენობით ვიდეო და აუდიო მასალა დაახლოებით 404 დისკი, ის მასალა არ შედის ხსენებულ 36 ათას ფაილში, ის არის აბსოლუტურად ცალკე საქმე და ამ საქმესთან დაკავშირებით ვაწარმოებთ გამოძიებას", - განაცხადა ირაკლი ღარიბაშვილმა.