"ჩვენ 28 ოქტომბერს არჩევნები მოგებული გვაქვს, რა ყალბი ციფრებიც არ უნდა აქვეყნოს ქართულმა ოცნებამ"- გრიგოლ ვაშაძე მარტვილში მოსახლეობას შეხვდა

პოლიტიკა - 13:37, 20 Oct, 2018

2235

გაერთიანებული ოპოზიცია - ძალა ერთობაშიას პრეზიდენტობის კანდიდატი მარტვილში მოსახლეობას შეხვდა. გრიგოლ ვაშაძის თქმით, 28 ოქტომბერი, არა მხოლოდ პრეზიდენტის არჩევის დღეა, არამედ არის რეფერენდუმი საქართველოს მომავალზე. გრიგოლ ვაშაძის განცხადებით, ხალხი მხარს უჭერს გაერთიანებულ ოპოზიციას და 28 ოქტომბერს პარტიათა კოალიცია გაიმარჯვებს, რის შემდეგაც ხელისუფლების მშვიდობიანი გზით ცვლილება დაიწყება. გაერთიანებული ოპოზიციის კანდიდატის თქმით, ხელისუფლებაში მოსვლისთანავე ერთხელ და სამუდამოდ დამთავრდება შურისძიება, რევანში, პოლიტიკური ოპონენტების დევნა და პოლიტიკური პოლიცია. ვაშაძე ოცნების გამოქვეყნებულ კვლევასაც გამოეხმაურა, რომლის მიხედვითაც ხელისუფლების მიერ მხარდაჭერილი დამოუკიდებელი კანდიდატი სალომე ზურაბიშვილი პირველივე ტურში იგებს და მას ყალბი ციფრები უწოდა:

„ჩვენ 28 ოქტომბერს არჩევნები მოგებული გვაქვს, რა ყალბი ციფრებიც არ უნდა აქვეყნოს ქართულმა ოცნებამ. მთავრია, რომ ჩვენ ეს გამარჯვება დავიცვათ არა გაერთიანებული ოპოზიციისთვის, არამედ საქართველოს მომავლისთვის იმიტომ, რომ 28 ოქტომბერი არის რეფერენდუმი საქართველოს მომავალზე.“ - განაცხადა გრიგოლ ვაშაძემ.