„გაერთიანებული ოპოზიცია 19,20, 21-ში თბილისში აქციას არ გეგმავს და შეხვედრებს რეგიონებში მართავს“ - ზურა მელიქიშვილი კალაძეს ურჩევს დედაქალაქის პრობლემებს მიხედოს

პოლიტიკა - 14:14, 17 Oct, 2018

1441

დედაქალაქის მერმა კახა კალაძემ დღეს გამართულ მთავრობის სხდომაზე განაცხადა, რომ 25 სექტემბერს მერიას განცხადებით მიმართა „ერთიანმა ნაციონალურმა მოძრაობამ“, რომლითაც პარტია ითხოვდა ნებართვას, 19, 20 და 21 ოქტომბერს რუსთაველის გამზირზე ფართომასშაბიანი მანიფესტაციის ჩასატარებლად. კალაძის თქმით, მიუხედავად იმისა, რომ მერიამ აღნიშნულ მოთხოვნაში დესტაბილიზაციის შექმნის მცდელობა დაინახა, განკარგულება მანიფესტაციის ჩასატარებლად მაინც გაიცემა.

როგორც აღმოჩნდა, 19, 20 და 21 ოქტომბერს, გაერთიანებული ოპოზიცია „ძალა ერთობაშიას“ საპრეზიდენტო კანდიდატი გრიგოლ ვაშაძე, ოპოზიციის სხვა ლიდერებთან და მხარდამჭერებთან ერთად დასავლეთში მართავს შეხვედრებს. კალაძის დღევანდელ განცხადებას კი ოპოზციიის რიგებში თბილისის მერის მხრიდან მუქარის გამოსახატად ჩვეულებრივ ბერკეტს უწოდებენ.

„ნიუპოსტთან“ საუბრისას, „ნაციონალური მოძრაობის“ პოლიტსაბჭოს წევრმა, ზურაბ მელიქიშვილმა განაცხადა, რომ მუქარების ენით საუბარს, უმჯობესი იქნება თუ მმართველი გუნდი ქვეყანაში არსებულ პრობლემებს მიხედავს, რომელიც უკვე ნებისმიერ სფეროს შეეხო:

„არ ვიცი რატომ დასჭირდა კალაძეს მუქარის სათქმელად ტექნიკური განაცხადი, რომელიც დაახლოებით ერთი თვის წინ იქნა გაკეთებული და ნებისმიერი საარჩევნო კამპანიის პერიოდში, ბუნებრივია ყველა მიმართულებით გარკვეული დაგეგმარებიდან გამომდინარე ტექნიკური წინმსწრები პროექტების მომზადება ხორციელდება ხოლმე. რაც შეეხება მაგ დღეებს, გაერთიანებული ოპოზიციის საპრეზიდენტო კანდიდატი, ბატონი გრიგოლ ვაშაძე, რომელიც აუცილებლად გახდება საქართველოს პრეზიდენტი, შეხვედრებს მართავს დასავლთ საქართველოში და ამასთან დაკავშირებით უშუალოდ განცხადებები კეთდება გაერთიანებული ოპოზიციის შტაბიდან. ნებისმიერი აქტივობა, რომელიც არის დაგეგმილი და რომელიც განხორციელდება გაერთიანებული ოპოზიციიდან, ამას გაიგებთ უშუალოდ გაერთიანებული ოპოზიციის შტაბიდან და არა სამთავრობო დაწესებულებიდან.

რაც შეეხება კონკრეტულ მუქარას ნებისმიერ აქციასთან დაკავშირებით, ნებისმიერ მსვლელობასთან დაკავშირებით და ასე შემდეგ, მინდა გითხრათ შემდეგი, რომ ეს არის კონსტიტუციით უზრუნველყოფილი და გარანტირებული. ამდენად, მერებს, გამგებლებს, რომლებიც არიან დანიშნული ივანიშვილის მხრიდან, მოვუწოდებთ, რომ ნებისმიერ შემთხვევაში, არც ერთ პოლიტიკურ ძალას და არც ერთ მსვლელობას ხელი კი არ შეუშალონ, არამედ პირიქით.

მათ მიხედონ იმ მდგომარეობას, რაც არის დღეს საქართველოში. ყველა მიმართულებით, ყველა სფეროში არის ჩავარდნა, კატასტროფა, დანაშაული არის უკვე ზედაპირზე და თვალსაჩინო არის ყველასთვის, ყველა სფეროს შეეხო, რა მდგომარეობაშია ეკონომიკა და რა მდგომარეობაშია ლარი. ამას მიხედონ და არა ტექნიკურ წერილებზე მობმით მუქარების განხორციელებას“, - განაცხადა ზურა მელიქიშვილმა.