„ერთი ადამიანი, რომელიც არის, თურმე, განაწყენებული ხელისუფლებაზე... პირობებს აყენებს... შანტაჟის არავის ეშინია"

„ერთი ადამიანი, რომელიც არის, თურმე, განაწყენებული ხელისუფლებაზე... პირობებს აყენებს... შანტაჟის არავის ეშინია" - ანრი ოხანაშვილი

პოლიტიკა - 23:51, 16 Oct, 2018

636

როგორ გაიცა გლდანის ციხეში შესვლის ნებართვა პარლამენტის თავმჯდომარის მიერ კვირა დღეს, სვეტიცხოვლობას - ეს საკითხი იყო გადაცემა არჩევანის ერთ-ერთი მთავარი თემა, რასაც "ქართული ოცნების" დეპუტატსა და ოპოზიციის წარმომადგენლებს შორის კამათი მოჰყვა.

ანრი ოხანაშვილი აცხადებს, რომ მიმოწერა პარლამენტში ელექტრონულად მიმდინარეობს და გასარკვევია, როგორ მოხვდა თარიღის თანხვედრა ნებართვის გაცემასთან.
„როდესაც პარლამენტის წევრს აქვს ნებისმიერ საჯარო დაწესებულებაში შესვლის უფლება, რომელიც უფრო მაღალ ლეგიტიმური უფლებაა, რომ ამ ადამიანს მიეცეს ნებისმიერი დაწესებულებაში შესვლის უფლება, თუ რაღაც ტექნიკური საკითხებით შეფერხდეს. ელექტრონული საქმის წარმოებიდან გამომდინარე, მე არ ვიცი, იქ თარიღებთან რა თანხვედრა აქვს,“ - ამბობს ოხანაშვილი.
სტუდიაში მყოფმა ოპოზიციის წარმომადგენლებმა განაცხადეს, რომ მათ არასდროს ეძლევათ საშუალება, უქმე დღეებში, ნებისმიერი საკითხის მიუხედავად, ციხეში შევიდნენ და პატიმარი მოინახულონ. მათ შორის, განცხადება გააკეთა ლევან სამუშიამაც, რომელმაც თქვა, რომ ის ადვოკატია და ისიც კი ვერ ახერხებს ამას.
რაც შეეხება სკანდალური ჩანაწერების შინაარსს, ანრი ოხანაშვილი ამბობს, რომ კითხვები არსებობს და მათ გამოძიებამ უნდა გასცეს პასუხი.

თუმცა, ანრი ოხანაშვილი აცხადებს, რომ ის ფაქტი, რომ მირზა სუბელიანი ზის ციხეში, არის პასუხი, რომ ხელისუფლებას მისი არ ეშინია.

„ერთი ადამიანი, რომელიც არის, თურმე, განაწყენებული ხელისუფლებაზე და რომელიც რაღაც პირობებს უყენებს ხელისუფლებას და ფაქტიურად შანტაჟს აქვს ადგილი, რომ რაღაც პირობების შექმნაზეა საუბარი, ამას პასუხი აქვს გაცემული, რომ ეს ადამიანი სისხლის სამართლის პასუხისგებაშია მიცემული. ამის მუქარის და შანტაჟის არავის არ ეშინია. თუ კი მან ჩაიდინა დანაშაული, მან პასუხი უნდა აგოს,“ - განაცხადა ანრი ოხანაშვილმა.