საპარლმენტო უმცირესობის ერთ-ერთი ლიდერი გიგა ბოკერია სკანდალურ ფარულ ჩანაწერებს ეხმაურება. საუბარია ჩანაწერზე, რომელიც დღეს პროკურატურამ გაავრცელა და სადაც კვლავ მირზა სუბელიანი და ვიქტორ ჯაფარიძე მონაწილეობენ.

უწყებაში დღეს განმარტეს, რომ გამოძიების ერთ-ერთი ვერსიით, შესაძლოა სუბელიანი ცრუ, გამოგონილი დანაშაულებრივი ფაქტების გასაჯაროებით იმუქრებოდეს.

„ჩემთვის აბსოლუტურად გაუგებარია, იმისდა მიუხედავად, აქ რამე პირდაპირ მანიპულაციას აქვს თუ არა ადგილი პროკურატურის ან მთავრობის მხრიდან, რას ცვლის ეს ინფორმაცია იმ უმძიმეს სურათში, რომელიც იხატება ამ ჩანაწერითაც კი. ეს უმძიმესი სურათი არის ის, სადაც ლოგიკურად მივიდა ქვეყანა ივანიშვილის მმართველობის ქვეშ, ეს არის ორგანიზებული დანაშაულებრივი ჯგუფების მმართველობა, კორუფცია, ხელის დაფარება პოლიტიკური ნეპოტიზმის ნიშნით, ყველანაირი დანაშაულზე წასვლა, რომ პოლიტიკური ამოცანა შესრულდეს, მთელი ეს ბუკეტი უმძიმესი ვითარების დასტურდება,“ - განაცხადა გიგა ბოკერიამ.