რუსეთის საპატრიარქოს მიერ მსოფლიო საპატრიარქოსთან ევქარისტული კავშირის გაწყვეტის საკითხს საქართველოს საპატრიარქოს მდივანი დეკანოზი მიქაელ ბოტკოველი გამოეხმაურა. ბოტკოველის თქმით, საქართველოს საპატრიარქო თავის პოზიციას ორივე მხარის არგუმენტების შესწავლის შემდეგ დააფიქსირებს:

„ძალიან სამწუხაროა ის, რაც ხდება მართლმადიდებელ ეკლესიაში, ვგულისხმობ ორი მძლავრი ეკლესიის კონსტანტინოპოლისა და რუსეთის საპატრიარქოების დაპირისპირებას. ალბათ იცით, რომ მინსკში ჩატარებულმა სინოდმა განაჩინა, მსოფლიო საპატრიარქოსთან ევქარისტული კავშირის გაწყვეტა. ჩვენ კიდევ ერთხელ აღვნიშნავთ ჩვენს მწუხარებას და გამოვთქვამთ იმედს, რომ სამომავლოდ ეკლესიები გააცნობიერებენ ამ შემთხვევის მნიშვნელობას და იქნება გამოინახოს გზა, რომელიც ამ ურთიერთობას აღადგენს. ეს ძალიან რეზონანსული იქნება და მთელ მართლმადიდებელ სამყაროში სერიოზულ დისონანსს შემოიტანს. რაც შეგვეხება ჩვენ, ჩვენ მოვისმინეთ მსოფლიო საპატრიარქოს განჩინება უკრაინის ეკლესიასთან დაკავშირებით და მოვისმინეთ მოსკოვის საპატრიარქოს რეაქცია, რომელმაც ჯერ განცხადებით, შემდეგ კი არგუმენტებით გაამყარა, თუ რატომ არ ეთანხმებიან მსოფლიო საპატრიარქოს განჩინებას. ჩვენ უნდა გულდასმით შევისწავლოთ არგუმენტები, რაც გავრცელდა მოსკოვის საპატრიარქოს მხრიდან და სავარაუდოდ იქნება ალბათ არგუმენტები კონსტანტინოპოლის საპატრიარქოს მხრიდანაც, თუ რის საფუძველზე მოახდინა ის ცვლილება, რაც მოხდა უკრაინაში. ჩვენ სხვა კომენტარებისგან თავს შევიკავებთ, ეს არის დიდი მასალა და რაც მთავარია ეს არის კანონიკური სამართლის ნორმები, რაც საფუძვლიან და ღრმა გამოკვლევას საჭიროებს. ჩვენ შევისწავლით ორივე პოზიციას გულდასმით, მიუკერძოებლად და შემდგომში საქართველოს წმინდა სინოდი იმსჯელებს ამ საკითხთან დაკავშირებით. ეს არის ძალიან მნიშვნელოვანი საკითხი და ამას ხვდება მართლმადიდებელი ეკლესია და საერთოდ საზოგადოებაც, რომ ასეთი რეზონანსული გადაწყვეტილებები მართლმადიდებელი ეკლესიის წიაღში არ ყოფილა ადრე მიღებული. ჩვენ ვხედავთ ძალიან დიდ საფრთხეებს აქ, ამიტომ მინდა სხვებსაც ვთხოვო და ჩვენს მრევლსაც, რომ გამოვიჩინოთ სიმშვიდე.“- განაცხადა მიქაელ ბოტკოველმა საპატრიარქოს ტელევიზიასთან.