გრიგოლ ვაშაძის საარჩევნო პლაკატების დაზიანებაში მონაწილეობას „ენერგოპრო“ უარყოფს - „სამხილის წარმოდგენის შემთხვევაში, კომპანია შესაბამის გადაწყვეტილებას მიიღებს“

პოლიტიკა - 14:28, 16 Oct, 2018

1153

გაერთიანებული ოპოზიციის „ძალა ერთობაშია“ ბრალდებებს პაუხობს „ენერგოპრო“. გრიგოლ ვაშაძის საარჩევნო შტაბის ინფორმაციას, რომ პლაკატებისა და ოფისების დაზიანება „ებერგოპროს“ მანქანების მონაწილეობით ხდებოდა, კომპანიაში უარყოფენ.

როგორც „ნიუპოსტს“ ენერგოპროს პრესამსახურში განუცხადეს, კომპანის ყველა თანამშრომელი, წინასაარჩევნო პერიოდში, დამატებით იქნა გაფრთხილებული, რომ არ ჩაერთონ პოლიტიკურ პროცესებში და მხოლოდ მათზე დაკისრებული საქმიანობით იყვნენ დაკავებული.

მათივე თქმით, თუკი ფაქტის დამადასტურებელი სამხილი იქნება წარმოდგენილი, კომპანიის მენეჯმენტი შესაბამის ზომებს მიიღებს ამა თუ იმ დასაქმებული პირის მიმართ.

„ენერგო-პრო ჯორჯია არასოდეს ჩარეულა და არც მომავალში ჩაერევა ქვეყანაში მიმდინარე პოლიტიკურ პროცესებში, რადგან ვთვლით, რომ პოლიტიკა არ არის ჩვენი საქმე -

ხაზგასმით ვაცხადებთ, რომ კომპანიის ერთადერთ საქმიანობას წარმოადგენს ელექტროენერგიის დისტრიბუცია, გენერაცია და აბონენტების ენერგომომარაგება. წინასაარჩევნო პერიოდში, ჩვენი ყველა თანამშრომელი, დამატებით იქნა გაფრთხილებული რომ ვინმე, რაიმე სახით არ ჩაერთოს პოლიტიკურ პროცესში და მკაცრად ორიენტირებულნი იყვნენ მხოლოდ მათ მეტად საპასუხისმგებლო საქმიანობაზე. რაც შეეხება ინფორმაციას, თითქოს კომპანიის მანქანების გამოყენებით მოხდა საარჩევნო პლაკატების შეღებვა, კატეგორიულად ვუარყობთ. თუმცა, თუ ვინმეს აქვს ფაქტის დამადასტურებული სამხილი და წარმოადგენს, კომპანიის მენეჯმენტი ინდივიდუალურად განიხილავს საკითხს და შესაბამის გადაწყვეტილებას მიიღებს“ - განუცხადებს „ნიუპოსტს“ ენერგოპროს პრესამსახურში.

როგორც ცნობილია, გუშინ გვიან ღამით, საქართველოს რამდენიმე ქალაქში საპრეზიდენტო კანდიდატის გრიგოლ ვაშაძის საარჩევნო პლაკატები და ოფისები წითელი საღებავით დააზიანეს. ოპოზიციის წარმომდგენლების ინფორმაციით, სენაკში აღნიშნულ ქმედებაში „ენერგოპროს“ მანქანები იყო გამოყენებული.