გაერთიანებულმა ოპოზიციამ - „ძალა ერთობაშია“ სამართალდამცავი ორგანოების სრულიად ახალი მოდელი მოამზადა. ოპოზიციის წევრების განცხადებით, მათ შეარჩიეს და გააერთიანეს ყველაზე წარმატებული კომპონენტები სხვადასხვა ქვეყნების მაგალითზე, შედეგად მოხდა ისეთი მოდელის შემუშავება, რომელიც ჯერ არც ერთ ქვეყანაში არ არის რეალიზებული.

გაერთიანებული ოპოზიციის საპრეზიდენტო კანდიდატის გრიგოლ ვაშაძის საარჩევნო შტაბის ხელმძღვანელის, გიორგი ვაშაძის განცხადებით, ახალი მოდელის მიხედვით, უნდა გაუქმდეს სუსი და შს სამინისტრო. პროკურატურას კი უნდა ჩამოერთვას საგამოძიებო ფუნქცია და მთავარი ფუნქცია დაეკისროს ანტიკორუფციულ ბიუროს.

„ჩვენ ფორმულაში სუს-ი უქმდება შს სამინისტრო უქმდება პროკურატურას ერთმევა საგამოძიებო უფლებამოსილება იქნება დამოუკიდებელი ანტიკორუფციული ბიურო, დამოუკიდებელი საგამოძიებო ბიურო და რაც მთავარია ხელმძღვანელებს საერთაშორისო ექსპერტთა კომისია აარჩევს და წარუდგენს დასამტკიცებლად ორ ან სამ კანდიდატს,“ - აცხადებს გიორგი ვაშაძე.

გაერთიანებული ოპოზიცია ინიციატივას დღეს ქართულ და საერთაშორისო არასამთავრობო ორგანიზაციებს გააცნობს.