„ჩემ გოგოს და მეგობრებს გამოვართვი, შევასრულე 50 000 ლარი და ისე გადავურიცხე ქალბატონ სალომეს“

„ჩემ გოგოს და მეგობრებს გამოვართვი, შევასრულე 50 000 ლარი და ისე გადავურიცხე ქალბატონ სალომეს“ - გორის მაჟორიტარის ფერისცვალება

პოლიტიკა - 10:39, 16 Oct, 2018

8221

გორის მაჟორიტარი დეპუტატი, რომელიც ჯერ კიდევ ერთი თვის წინ წუწუნებდა, რომ მმართველი პოლიტიკური ძალის მიერ მხარდაჭერილი საპრეზიდენტო კანდიდატისთვის შესაწირი თანხა არ ჰქონდა, სალომე ზურაბიშვილის ერთ-ერთი მსხვილი შემომწირველი გახდა.
დღეს იოსებ მაკრახიძე აცხადებს, რომ მან ზურაბიშვილისთვის შეწირული თანხა შვილს და მეგობრებს გამოართვა.

„დანაზოგი მაგდენი არ მქონდა, ამიტომ ჩემ გოგოს და მეგობრებს გამოვართვი, შევასრულე 50 000 ლარი და ისე გადავურიცხე ქალბატონ სალომეს. საერთოდ, რასაც ვაკეთებ, მერე აღარ ვნანობ ხოლმე“, - ამბობს მაკრახიძე "რადიო მოზაიკასთან".
მაკრახიძემ სექტემბრის დასაწყისში რადიო “მოზაიკასთან” საუბრისას ზურაბიშვილისთვის შესაძლო დახმარებაზე განაცხადა:
"რა წვლილი უნდა შევიტანო ზურაბიშვილის საარჩევნო კამპანიის დაფინანსებაში, სად მაქვს მაგის სახსრები". თუმცა, 10 ოქტომბერს მაკრახიძემ ზურაბიშვილს 50 ათასი ლარი შესწირა.
რადიო „მოზაიკამ“ მაკრახიძეს 2011-12 წლები შეახსენა, რა დროსაც „ერთიანი ნაციონალური მოძრაობას“ პირველ შემთხვევაში 100000 ლარი, შემდეგ კი 25 000 ლარი შესწირა, რაზეც დეპუტატმა აღნიშნა, რომ თანხა არა სააკაშვილს, არამედ მაშინდელ მმართველ ძალას გადაურიცხა.