პროკურატურაში დეპუტატ ვიქტორ ჯაფარიძის გამოკითხვა დასრულდა

პოლიტიკა - 19:37, 15 Oct, 2018

697

მთავარ პროკურატურაში საპარლამენტო უმრავლესობის წევრის, დეპუტატ ვიქტორ ჯაფარიძის გამოკითხვა დასრულდა. საგამოძიებო უწყებაში ჯაფარიძე იმ ფარულ ჩანაწერთან დაკავშირებით გამოკითხეს, რომელშიც ის და მირზა სუბელიანი ფიგურირებენ.

გამოკითხვიდან გამოსულმა ჯაფარიძემ მედიასთან განაცხადა, რომ გამომძიებლები დაინტერესდნენ იმით, შეხვდა თუ არა ის მირზა სუბელიანს გლდანის მე-8 სასჯელაღსრულების დაწესებულებაში. ჯაფარიძემ შეხვედრა ჟურნალისტებთანაც დაადასტურა, თუმცა სხვა დეტალებზე აღარ უსაუბრია.

სკანდალური ჩანაწერები გლდანის #8 სასჯელაღსრულების დაწესებულებაშია გაკეთებული. ჩანაწერების მიხედვით, სუბელიანთან საკანში იმყოფებიან „ქართული ოცნების“ დეპუტატი მესტიიდან, ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი და მირზა სუბელიანის მარჯვენა ხელი, დათო ცუხიშვილი.

საუბარი თითქმის, საათნახევარი გრძელდება, საიდანაც ირკვევა, რომ მირზა სუბელიანი, ფაქტობრივად, საკუთარი ნებით ჩაჯდა ციხეში - ის გაურიგდა ხელისუფლებას. ვადაც კი წინასწარ არის შეთანხმებული, რამდენ ხანს უნდა დარჩეს ის პატიმრობაში, მაგრამ სუბელიანი უკმაყოფილებას გამოთქვამს მმართველი გუნდის დამოკიდებულებით, ის ამბობს, რომ ხელისუფლება ჯეროვნად ვერ აფასებს მის ერთგულებას, ვინაიდან მან იმდენი რამ იცის, რომ საკმარისია ერთი ან ორი ფაქტი გაასაჯაროვოს, რომ რუსთაველის გამზირი გადაიჭედება და „ქართული ოცნება“ ხელისუფლებაში აღარ იქნება.