ამერიკის შეერთებული შტატების პრეზიდენტი უშვებს შესაძლებლობას, რომ რუსეთის პრეზიდენტი დაკავშირებულია მკვლელობებთან და მოწამვლის ფაქტებთან. ამის შესახებ განცხადება დონალდ ტრამპმა CBS-თან ინტერვიუში გააკეთა.

კითხვის პასუხად, ეთანხმება თუ არა ის , რომ პუტინს კავშირი აქვს მსოფლიოს სხვადახვა კუთხეში მომხდარი მოწამვლების და მკვლელობების სერიასთან, დონალდ ტრამპმა განაცხადა: „დიახ, ალბათ აქვს, ალბათ“.

რუსეთის პრეზიდენტის პრეს-მდივანმა, ამერიკის პრეზიდენტის რეზონანსული განცხადების კომენტირებისას განაცხადა, რომ არ დაიწყებს ტრამპის სიტყვების შეფასებას იმგვარად, თითქოს ამერიკის პრეზიდენტს ნამდვილად სჯერა პუტინის მკვლელობებთან და მოწამვლებთან კავშირის. პესკოვმა ყვლაფერი „ლინგვისტური თავისებურებებით“ ახსნა.

კრემლის წარმომადგენლმა ხაზი გაუსვა იმას, რომ ტრამპს „არანაირი პირდაპირი ბრალდებები არ გაუჟღერებია“ და არ გაუმყარებია თავისი ნათქვამი არგუმენტებით და მტკიცებულებებით.

შეგახსენებთ, ტრამპმა CBS-თან ინტერვიუში ასევე განაცხადა, რომ პუტინთან ურთიერთობაში მისი პოზიცია გაცილებით მკაცრია, ვიდრე მისი წინამორბედი პრეზიდენტის, ბარაკ ობამასი.