"დადასტურდა, რომ მერაბიშვილი ნამდვილად იქნა ფარულად და უკანონოდ გაყვანილი მისი საკნიდან"- ადვოკატები მერაბიშვილის გათავისუფლებას და დამნაშავეების დასჯას ითხოვენ

პოლიტიკა - 13:04, 15 Oct, 2018

3173

გუშინ რუსთავი2-ის ეთერში გასულ ფარულ ჩანაწერებთან დაკავშირებით პატიმრობაში მყოფილი ყოფილი პრემიერ-მინისტრის, ვანო მერაბიშვილის ადვოკატები განცხადებას ავრცელებენ. მერაბიშვილის უფლებადამცველების თქმით, გავრცელებული ჩანაწერებით, კიდევ ერთხელ დადასტურდა, რომ მერაბიშვილის პატიმრობა განპირობებულია პოლიტიკური მოტივებით. ადვოკატები მოითხოვენ, რომ ხელისუფლებამ დაუყოვნებლივ აღასრულოს სტრასბურგის სასამართლოს გადაწყვეტილება და გაათავისუფლოს ივანე მერაბიშვილი პოლიტიკური პატიმრობიდან და დაიწყოს სისხლის სამართლებრივი დევნა, როგორც ამ დანაშაულის უშუალო შემსრულებლების, მათ შორის ოთარ ფარცხალაძისა და იმჟამინდელი სასჯელაღსრულების მინისტრის, სოზარ სუბარის, ასევე ამ უკანონო ქმედების დამკვეთების წინააღმდეგ:

„14 ოქტომბერს, ტელეკომპანია „რუსთავი 2“-ის მიერ გავრცელებული ჩანაწერებით, კიდევ ერთხელ, ამჯერად უკვე სასჯელაღსრულების სამინისტროს გენინსპექციის ყოფილი უფროსის, მირზა სუბელიანის სიტყვებით დადასტურდა, რომ 2013 წლის 14 დეკემბერს, ყოფილი პრემიერ-მინისტრი ივანე მერაბიშვილი ნამდვილად იქნა ფარულად და უკანონოდ გაყვანილი მისი საკნიდან, იმჟამინდელ მთავარ პროკურორთან, ოთარ ფარცხალაძესთან შესახვედრად. მირზა სუბელიანის საუბრიდან ნათლად ჩანს, რომ აღნიშნულ დანაშაულში ჩართული იყო მთელი სახელისუფლებო ვერტიკალი, რაც კიდევ ერთხელ ადასტურებს იმ ფაქტს, რომ ივანე მერაბიშვილის პატიმრობა განპირობებულია პოლიტიკური მოტივებით.

შეგახსენებთ, რომ აღნიშნული ფაქტი დადასტურებულია ევროპის ადამიანის უფლებათა სასამართლოს დიდი პალატის გადაწყვეტილებითაც, რის გამოც მის მიმართ დადგინდა ევროპის ადამიანის უფლებათა კონვენციის 18-ე მუხლის დარღვევა. შესაბამისად, დღეის მდგომარეობით, ივანე მერაბიშვილი წარმოადგენს ერთადერთ პოლიტპატიმარს, რომელიც მიუხედავად სტრასბურგის სასამართლოში საქმის 18-ე მუხლით მოგებისა, კვლავაც პატიმრობაში რჩება.“

მოვითხოვთ, ხელისუფლებამ დაუყოვნებლივ აღასრულოს სტრასბურგის სასამართლოს გადაწყვეტილება და გაათავისუფლოს ივანე მერაბიშვილი პოლიტიკური პატიმრობიდან. გარდა ამისა, მოვითხოვთ, დაიწყოს სისხლის სამართლებრივი დევნა, როგორც ამ დანაშაულის უშუალო შემსრულებლების, მათ შორის ოთარ ფარცხალაძისა და იმჟამინდელი სასჯელაღსრულების მინისტრის, სოზარ სუბარის, ასევე ამ უკანონო ქმედების დამკვეთების წინააღმდეგ.“- ნათქვამია განცხადებაში.