ამ ჩანაწერებით მთლიანად გაშიშვლდა "ოცნების" სახელისუფლებო ვერტიკალი - ზაალ უდუმაშვილი სუბელიანის სკანდალურ ჩანაწერზე

პოლიტიკა - 10:25, 15 Oct, 2018

1325

„რუსთავი 2“-ის ეთერში გასულ ფარულ აუდიო ჩანაწერებს, რომელშიც სავარაუდოდ პროკურატურის ყოფილი მაღალჩინოსანი, ამჟამად წინასწარ პატიმრობაში მყოფი მირზა სუბელიანი საუბრობს, ოპოზიცია ეხმაურება. ენმ-ს წევრი ზაალ უდუმაშვილის თქმით, ამ ჩანაწერებით გამოჩნდა ზოგადად როგორ მართავს დღეს ბიძინა ივანიშვილი ქვეყანას:

„ამ ჩანაწერებით მთლიანად გაშიშვლდა დღეს ქართული ოცნების სახელისუფლებო ვერტიკალი და დავინახეთ ყველამ რეალურად როგორ გვარდება საქმეები, ვისი დახმარებით, რა შეიარაღებული დაჯგუფებების დახმარებით და ზოგადად როგორ მართავს დღეს ბიძინა ივანიშვილი ქვეყანას“- განაცხადა ზაალ უდუმაშვილმა.

სკანდალური ჩანაწერები გლდანის #8 სასჯელაღსრულების დაწესებულებაშია გაკეთებული. ჩანაწერების მიხედვით, სუბელიანთან საკანში იმყოფებიან „ქართული ოცნების“ დეპუტატი მესტიიდან, ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი და მირზა სუბელიანის მარჯვენა ხელი, დათო ცუხიშვილი.

საუბარი თითქმის, საათნახევარი გრძელდება, საიდანაც ირკვევა, რომ მირზა სუბელიანი, ფაქტობრივად, საკუთარი ნებით ჩაჯდა ციხეში - ის გაურიგდა ხელისუფლებას. ვადაც კი წინასწარ არის შეთანხმებული, რამდენ ხანს უნდა დარჩეს ის პატიმრობაში, მაგრამ სუბელიანი უკმაყოფილებას გამოთქვამს მმართველი გუნდის დამოკიდებულებით, ის ამბობს, რომ ხელისუფლება ჯეროვნად ვერ აფასებს მის ერთგულებას, ვინაიდან მან იმდენი რამ იცის, რომ საკმარისია ერთი ან ორი ფაქტი გაასაჯაროვოს, რომ რუსთაველის გამზირი გადაიჭედება და „ქართული ოცნება“ ხელისუფლებაში აღარ იქნება.