საპარტნიორო ფონდის ხელმძღვანელი დავით საგანელიძე ყოფილ მთავარ პროკურორთან ოთარ ფარცხალაძესთან ყოველგვარ კავშირს უარყოფს. საგანელიძე აცხადებს, რომ ყოფილ პროკურორს არც საპარტნიორო ფონდთან და არც მასში შემავალ კომპანიებთან, კავშირი არ აქვს:

"მე სხვათაშორის მერე სპეციალურად მოვუსმინე როცა მითხრეს. სულ სხვა ვერსიები ჰქონდა ერთი და იგივე საუბრისას და დღეს როგორც მითხრეს, კიდევ სხვა ვერსია თქვა. ასე ნებისმიერმა ადამიანმა ნებისმიერ „ფაქტზე“ შეიძლება ისაუბროს, რომელიც არანაირ კავშირში არაფერთან არ არის.

გუშინ ჩვენი საპარტნიორო ფონდის იურიდიულმა დეპარტამენტმა გააკეთა განმარტება მე არაფერს დავამატებ. გეტყვით ერთს, რომ არანაირი შეხება არც თავიდან მშენებლობის პროცესში, არც მუშაობის პროცესში, არც როგორც დამფუძნებელს, არც როგორც კონსულტანტს, ბატონ ფარცხალაძეს ფონდთან, არ ჰქონია არ აქვს და რა იქნება მომავალში, ამაზე ახლა არ ვისაუბრებ“, - განაცხადა საგანელიძემ.

ჟურნალისტის შეკითხვაზე, რატომ ახსენა ფარცხალაძის ადვოკატმა მისი და საპარტნიორო ფონდის კავშირი, საგანელიძემ უპასუხა:

"მე მეკითხებით, გენაცვალე, რატომ გააკეთა განცხადება? ჩვენ ახლა კაფეში ვსხედვართ და ვსაუბრობთ, რას ემსახურება მისი განცხადება? არ მაინტერესებს, რომელიღაცა ადვოკატი, რომელიც პირველად ვნახე ცხოვრებაში, რას საუბრობს და მეკითხებით რატომ თქვა ეს განცხადება. მას ჰკითხეთ, მე მინდა გავიმეორო და მოგცათ ეს განმარტება დეპარტამენტმა,რომ არანაირი ურთიერთობა არ ჰქონია.“-განაცხადა საგანელიძემ.