უკრაინის ეკლესიის ავტოკეფალია - რუსეთი მსოფლიო საპატრიარქოსთან ევქარისტული კავშირის გაწყვეტით იმუქრება

მსოფლიო - 12:03, 12 Oct, 2018

2175

რუსეთის საპატრიარქო კონსტანტინოპოლის სააპატრიარქოს სინოდის გადაწყვეტილებას სხვა ეკლესიის საქმეებში ჩარევად აფასებს და ამ მხრივ უპრეცედენტოს უწოდებს. ამის შესახებ რუსულ მედიასთან მოსკოვის პატრიარქის პრეს-მდივანმა ალექსანდრ ვოლკოვმა განაცხადა.

„არ ყოფილა არცერთი პრეცედენტი მსოფლიო ისტორიაში, რომ კონსტანტინოპოლი ასე თავხედურად და აგრესიულად ჩარეულიყო სხვა მართლმადიდებელი ეკლესიის საქმეებში. განდგომილების ლეგალიზაცია, კიდევ უფრო სამწუხარო ნაბიჯების წინამორბედი იქნება, რომლის გადადგმაც რუსეთის მართლმადიდებელ ეკლესიას მოუწევს, რომელიც დაკავშირებული იქნება ევქარისტული კავშირის გაწყვეტასთან და სხვა სხვა გადაწყვეტილებებთან.“- განაცხადა ვოლკოვმა, მისი თქმით კონსტანტინოპოლმა მთელი მართლმადიდებელი სამყაროსთვის კატასტროფული გადაწყვეტილება მიიღო.

შეგახსენებთ, მსოფლიო პატრიარქმა უკრაინის მართლმადიდებელი ეკლესიისთვის ავტოკეფალიის მინიჭებასთან დაკავშირებით გადაწყვეტილება მიიღო, ამის შესახებ საუბარია განცხადებაში, რომელიც მსოფლიო საპატრიარქოს საიტზე გამოქვეყნდა. კონსტანტინოპოლის მართლმადიდებელი ეკლესიის წმიდა სინოდის გადაწყვეტილებით, უკრაინის მართლმადიდებელი ეკლესიის კიევის საპატრიარქოს მეთაური - პატრიარქი ფილარეტი და უკრაინის ავტოკეფალური მართლმადიდებელი ეკლესიის მეთაური - მაკარ მალეტიჩი და მათი მრევლი კანონიკურ სტატუსში აღადგინა. ამასთანავე დაადასტურა უკვე მიღებული გადაწვეტილება იმის შესახებ, რომ მსოფლიო საპატრიარქო იწყებს უკრაინის ეკლესიისთვის ავტოკეფალიის მინიჭებას.