ამასთან, მოკლულის ახლობლები მიიჩნევენ, რომ სოსო პავლიაშვილი, სავარაუდოდ, საქართველოში ჩამოსვლისგან თავს შეიკავებს. როგორც თბილისის საქალაქო სასამართლოში ავთანდილ ადუაშვილის მკვლელობის საქმეზე სასამართლო პროცესის მიმდინარეობისას ზაზა მესხმა ჟურნალისტებს განუცხადა, მასთან მივიდა სოსო პავლიაშვილისა და ჩხაპელიას მეგობარი ლევან ჯავახაძე, რომელიც ამავდროულად ადვოკატია და სთხოვა, მოკლულის მშობელთან და შვილთან მისულიყო შუამდგომლობით, რათა ჩხაპელიასთან საპროცესო გარიგება მომხდარიყო.

"მე მას ვუპასუხე, რომ ამ შუამდგომლობით ოჯახს მივმართავდი, თუკი ჩხაპელია სიმართლეს იტყოდა. ადვოკატმა მითხრა, რომ აღიარებითი ჩვენება ჩხაპელიას უკვე მიცემული აქვს და მეტს ვეღარაფერს იტყოდა. ეს ჩვენება, რომელიც საზოგადოებისთვის ცნობილი გახდა, მოიცავს ისეთ დეტალებს, რომელიც ჩხაპელიას გარდა არავის შეიძლებოდა სცოდნოდა. შესაბამისად, გამორიცხულია, რომ გამოძიებისთვის პირველი ჩვენების მიცემის დროს ჩხაპელიაზე რაიმე ზეწოლა განხორციელებულიყო, თუმცა ჩხაპელიამ ეს ჩვენება შეცვალა", - აღნიშნა ზაზა მესხმა.

მან გაიხსენა ავთანდილ ადუაშვილთან ერთ-ერთი ბოლო საუბარი. ადუაშვილის ოჯახის ახლობლის ინფორმაციით, მკვლელობის წინა დღეს ადუაშვილმა მას უთხრა, რომ 24 ნოემბერს აპირებდა ერევანში ჩასვლას, სადაც იმყოფებოდა სოსო პავლიაშვილი და აპირებდა მასთან ყველანაირი ურთიერთობის გაწყვეტას. ამის მიზეზად კი, როგორც ზაზა მესხი ამბობს, ადუაშვილმა დაასახელა ის, რომ პავლიაშვილი მას პრობლემებს უქმნიდა.

"თუმცა არ აცადეს ერევანში ჩასვლა და მოკლეს. მე ვამბობ, რომ მკვლელობის შემსრულებლები არიან ის ადამიანები, რომლებიც ბრალდებულის სკამზე სხედან, ხოლო შემკვეთი იმყოფება მოსკოვში და ეს არის სოსო პავლიაშვილი", - აღნიშნა ზაზა მესხმა.

მისივე თქმით, სოსო პავლიაშვილის წინააღმდეგ სისხლის სამართლის საქმე ცალკეა გამოყოფილი, თუმცა, მოკლულის ახლობლები ვარაუდობენ, რომ სოსო პავლიაშვილი საქართველოში ჩამოსვლისგან თავს შეიკავებს. ამასთან, როგორც ადუაშვილის ახლობელმა განაცხადა, თუკი სიმართლეა, რომ სოსო პავლიაშვილი ავთანდილ ადუაშვილს უახლოეს მეგობრად თვლიდა, მკვლელობის პერიოდში პავლიაშვილი იმყოფებოდა ერევანში კონცერტების გასამართად და იგი მეგობრის პანაშვიდზე ჩამოვიდოდა.