"ეს იყო ჩვეულებრივი თავდასხმა ჟურნალისტებზე" - რუსთავი 2 -ის ჟურნალისტები მათი ცემის ფაქტზე რეაგირებას ითხოვენ

პოლიტიკა - 18:02, 10 Oct, 2018

1932

"რუსთავი 2" - ის თანამშრომლები, ჟურნალისტი ეკა გაგუა და ოპერატორი ლევან კალანდია იმედს გამოთქვამენ, რომ ის პირები, რომლებიც მათ ფიზიკურად გაუსწორდნენ კანონის შესაბამისად დაისჯებიან.

დაზარალებულები უკვე გამოკითხეს ხაშურის პოლიციაში, ორივე მათგანს გორის საექსპერტო ბიურომში ექსპერტიზაც ჩაუტრარდათ.

ჟურნალისტისა და ოპერატორის თქმით, სხეულზე დაზიანებები აღენიშნებათ.

„ეს იყო ჩვეულებრივი თავდასხმა ჟურნალისტებზე. ეს იყო ხელის შეშლა ჟურნალისტურ საქმიანობაში, ეს იყო მუქარა და ფიზიკური ძალადობა იმის გამო, რომ ჩვენ გადავიღეთ ის პრობლემები, რომელიც არსებობს ამ პროექტთან დაკავშირებით. კომპანიის მხრიდან მას შემდეგ არანაირი კომუნიკაცია არ ყოფილა. პოლიცია მოვიდა, უკვე ისინი გარშემო იდგნენ და ჩვენთან აღარ მოსულან. გაგრძელდება ძიება და დიდი იმედი მაქვს, რომ ეს ძიება შედეგიანი იქნება და ის ადამიანები, ვინც იქ იყვნენ და ვინც ძალიან კარგად ჩანან, ჩვენს კადრებში, დაისჯებიან,“- განაცხადა ეკა გაგუამ.

„კურიერის“ ოპერატორმა, ლევან კალანდიამ ინციდენტი დეტალურად გაიხსენა.

„მოგვთხოვეს, რომ მასალა, რაც გადავიღე, ჩიპი მიმეცა, ჩიპი არ მივეცი, ამან აგრესია გამოიწვია და მომთხოვეს, რომ კამერა მიმეცა. კამერა არ მივეცი, მაგრამ იძულებული ვიყავი, რომ კამერა მიმეცა, რადგან კამერა წამართვეს, რამდენიმე კაცი იყო, სხვა გზა არ გვქონდა. ამასობაში ჩიპის ამოღება მოვახერხე,“- განაცხადა ლევან კალანდიამ.

შს სამინისტრომ გამოძიება ჟურნალისტისთვის ხელის შეშლის მუხლით დაიწყო, რაც ჯარიმას ან 2 წლამდე ვადით თავისუფლების აღკვეთას ითვალისწინებს.

„რუსთავი 2"-ის გადამღებ ჯგუფს ჩინეთის რკინიგზის 23-ე ბიუროსსაქართველოს ოფისის წარმომადგენლები გაუსწორდნენ.