კვესიტაძე საკუთარ ,,ფეისბუქ" გვერდზე გადაცემის დახურვის თემას ეხმაურება და აღნიშნავს, რომ საკუთარი გადაცემის დახურვის შესახებ მისთვის მხოლოდ გუშინ გახდა ცნობილი.

,,გადაცემა ,,აქცენტები" დახურეს, როგორც ჩანს, ხელისუფლების გადაწყვეტილების შედეგად.

არხის ახალი გენერალური დირექტორი არაერთხელ დაპირდა სამეურვეო საბჭოს, რომ ჩემი საავტორო გადაცემა - "აქცენტები" არ დაიხურებოდა (არსებობს ამის დამადასტურებელი ვიდეო ჩანაწერებიც). თუმცა, როგორც გუშინ - 2 სექტემბერს პირველ არხზე გასული სიუჟეტიდან შევიტყვეთ, გადაცემა "აქცენტები" ახალ ბადეში აღარ ფიგურირებს. საინტერესოა ის ფაქტი, რომ რვა თვის განმავლობაში არხის დირექტორი, მხოლოდ ერთხელ, ისიც შემთხვევით ვნახე. მიუხედავად იმისა, რომ მან რამდენჯერმე უთხრა სამეურვეო საბჭოს, რომ ჩემთან, ისევე როგორც სხვა წამყვანებთან მოლაპარაკებებს აწარმოებდა, ასეთი მოლაპარაკება არცერთხელ არ გამართულა. ჩემი ბოლო მცდელობა, მას შევხვედროდი და ჩემი გადაცემის შესახებ მკაფიო პასუხი მიმეღო, ასევე წარუმატებლად დასრულდა. ამავდროულად, გადაცემა "აქცენტების" პროდიუსერს ირაკლი ტაბლიაშვილს აღარ გაუგრძელეს ხელშეკრულება.

არჩევნებამდე ორი თვითი ადრე საზოგადოებრივ მაუწყებელზე პოლიტიკური დებატების შეწყვეტა, ვფიქრობ, არის პოლიტიკური გადაწყვეტილება, რომელიც ხელისუფლების უმაღლეს ეშელონებშია მიღებული და მედიის გადანაწილების და მასზე ზეწოლის ახალ სქემაში პირდაპირ ჯდება. საზოგადოებრივ მაუწყებელს, რომლის მთავარი პრიორიტეტი საზოგადოებრივ-პოლიტიკური გადაცემებია, საზოგადოების წინაშე ვალდებულება აქვს წინასაარჩევნო პერიოდში ეთერში გაუშვას პოლიტიკური თოკ-შოუები. ამის მაგივრად არხის დირექტორისგან გუშინ ვიგებთ, რომ მაყურებელი მხოლოდ სექტემბრის ბოლოს გაიგებს, ვინ იქნებიან პოლიტიკური გადაცემის წამყვანები. ხოლო როდის დაიწყება თავად გადაცემები, ამის შესახებ მას მინიშნებაც კი არ გაუკეთებია,"- წერს კვესიტაძე.