„ხელისუფლებას საპატრიარქოსთან არჩევნების წინ სიტუაციის გამწვავება არ სურს“ - კანაფის კულტივაცია/ექსპორტის საკითხის გადავადება

პოლიტიკა - 12:32, 09 Oct, 2018

913

კანაფის კულტივაცია/ექსპორტი - კანონპროექტის პარლამენტში განხილვის ორი თვით გადადების საკითხს „ადამიანის უფლებების სწავლებისა და მონიტორინგის ცენტრის (EMC) წარმომადგენელი, სოფო ვერძეული გამოეხმაურა. მისი განცხადებით, საკითხის გადადგება მიანიშნებს იმაზე, რომ სავარაუდოდ ეს არის იმ მოლაპარაკებების ნაწილი, რომელის კანონპროექტის ინიციატორებს საპატრიარქოსთან ჰქონდათ:

„ჩვენ ვფიქრობდით, რომ ამ კანონპროექტის ინიცირება იყო ნაჩქარევი და მოუმზადებელი მაშინ, როდესაც ნარკოპოლიტიკის მიმართულებით ძალიან ბევრი გამოწვევაა, არ ვფიქრობდით, რომ დღის წესრიგში ასეთი სერიოზულობით უნდა დამდგარიყო კანაფის ექსპორტის საკითხი. განსხვავებული მოსაზრება ჰქონდათ ასევე სხვა ჯგუფებს, მათ შორის, საპატრიარქოს. მიუხედავად იმისა, რომ ჩვენი არგუმენტები ერთმანეთს არ ემთხვეოდა, ვფიქრობთ, რომ კანონპროექტის ნაჩქარევად განხილვა არ იყო მიზანშეწონილი. თუმცა, ორი თვით საკითხის გადავადება და არჩევნების შემდგომ განხილვა სავარაუდოდ მიანიშნებს, რომ ეს არის იმ მოლაპარაკებების შედეგი, რომელიც ხელისუფლებას და კანონპროექტის ინიციატორებს საპატრიარქოსთან ჰქონდათ. სავარაუდოდ, ხელისუფლებას არ სურდა დამატებითი განხილვები არჩევნების წინ და დამატებითი გაუგებრობების წარმოშობა ამ საკითხთან დაკავშირებით.

რაც შეეხება კანონპროექტს, ვფიქრობ, რომ დამატებითი მუშაობა სჭირდება და ამ საკითხს ნარკოპოლიტიკასთან ბევრი არაფერი აკავშირებს, გარდა იმისა, რომ კანაფზეა უბრალოდ ლაპარაკი.

ეს არ არის პირველი შემთხვევა, როდესაც ჩვენ ვხედავთ საპატრიარქოს ან მასთან დაახლოებული პირების მიერ წინააღმდეგობას, რომელიც არაერთ შემთხვევაში დასრულებულა პოზიციების ცვლილებით ხელისუფლების მხრიდან. ესეც შეიძლება იყოს ერთ-ერთი ასეთი ინიციატივა. ყოველ შემთხვევაში, გადავადება მიანიშნებს იმაზე, რომ არჩევნების წინ არ აქვს ხელისუფლებას სურვილი, რომ საპატრიარქოსთან დამატებით გაამწვავოს ან დებატებში შევიდეს ამ საკითხთან დაკავშირებით და სავარაუდოდ ეს არის ამის მოტივაცია და საფუძველი",- განაცხადა ვერძეულმა.