გაერთიანებული ოპოზიციის „ძალა ერთობაშიას“ წინასაარჩევნო შეხვედრის დროს ინციდენტს ჰქონდა ადგილი, დაპირისპირება მოხდა ოპოზიციისა და „ქართული ოცნების“ მხარდამჭერებს შორის.

დიდუბეში გრიგოლ ვაშაძის საარჩევნო შტაბის წევრებისა და მოსახლეობის შეხვედრის დროს, ადგილზე „ქართული ოცნების“ მხარდამჭერები მივიდნენ.

ოპოზიციის წარმომადგენლების განცხადებით, აღნიშნული პირები პროვოკაციულ განცხადებებს აკეთებდნენ, ერთ-ერთმა კი რომელიც მე-15 საბავშვო ბაღის დირექტორია, ფიზიკური შეურაცხყოფა მიაყენა ზაალ უდუმაშვილის თანაშემწეს. თამარ ზერეკიძემ ამის შესახებ ინფორმაცია პოლიციას მიაწოდა.

„დაიწყეს ცუდი სიტყვებით, პროვოკაციული გამოთქმებით ჩვენს მიმართ რაღაც-რაღაცების ძახილი. რამდენიმე ადამიანმა ეს ქალბატონი იცნო და აღმოჩნდა მეთხუთმეტე ბაღის დირექტორი. ვთხოვე ეთქვა ჩვენთვის ნამდვილად იყო თუ არა ბაღის დირექტორი, მქონდა ტელეფონი და თან ვიღებდი. ამის გაგონებაზე, მეცა ტელეფონზე, სახეში ჩამარტყა ჩანდა, დაიწყო რტყმა, ჭიდაობა, ტელეფონის წართმევა. მინდა რომ შევიტანო სარჩელი, იმიტომ, რომ ქალბატონი ბრძანდება ბაღის დირექტორი,“-აცხადებს ზაალ უდუმაშვილის თანაშემწე თამარ ზერეკიძე.

მომხდარზე გამოძიება ძალადობის მუხლით არის დაწყებული.