გაერთიანებული ოპოზიცია „ძალა ერთობაშია“ ახალი თაობის რეფორმების განრიგის შესამუშავებლად, ფართო საზოგადოებრივ დისკუსიებს იწყებს

პოლიტიკა - 16:17, 08 Oct, 2018

1050

გაერთიანებული ოპოზიცია „ძალა ერთობაშია“ ახალი თაობის რეფორმების განრიგის შესამუშავებლად, ფართო საზოგადოებრივ დისკუსიებს იწყებს:

„საქართველოში განვითარებული ბოლო რამოდენიმე წლის განმავლობაში ნათლად გამოიკვეთა ქვეყანაში დამყარებული არაფორმალური მმართველობის ნიშნები და ის მწვავე შედეგები, რომელმაც ქვეყნის დემოკრატიული სისტემის კრიზისი გამოიწვია.

არაფორმალური მმართველობის შედეგად დემოკრატიული საზოგადოების ისეთმა ფუნდამენტურმა პრინციპებმა, როგორიცაა - კანონის უზენაესობა და კანონის წინაშე თანასწორობა, ადამიანის უფლებების დაცვა და პატივისცემა და სამართლიანობა - მნიშვნელობა და ფუნქციური როლი დაკარგეს, რადგანაც საჯარო ინსტიტუტები იცავენ და ემსახურებიან არა მოქალაქეებს, არამედ ვიწრო ჯგუფსა და მათ პირად ინტერესებს. არაფორმალური მმართველობის წარმოშობისა და სწრაფი გაძლიერების შედეგად გამოიკვეთა პრობლემები საზოგადოებრივი ცხოვრებისათვის აუცილებელ ისეთ უმნიშვნელოვანეს დარგებში, როგორიცაა: სამართალდამცავი ორგანოების ფუნქციონირება, სასამართლო სისტემა, ეკონომიკური და სოციალური პოლიტიკა და სხვა.

უკანასკნელ პერიოდში განვითარებულმა მოვლენებმა ცხადყო, რომ საქართველოს მოსახლეობის კეთილდღეობის ხარჯზე ხდება საჯარო რესურსების უმიზნო ფლანგვა ვიწრო ჯგუფის კერძო ინტერესების სასარგებლოდ. ამ ფონზე, ქვეყნის გაძლიერებისა და ჯანსაღი, მდგრადი განვითარების ნაცვლად, ხდება მოსახლეობის მიზანმიმართული გაღარიბება და იმ მნიშვნელოვანი საარსებო წყაროების მისაკუთრება, რაც მოსახლეობის კეთილდღეობისათვის არსებითად მნიშვნელოვანია. გარდა ამისა, სამართალდამცავი ორგანოების უკიდურესი პოლიტიზირების ფონზე კანონის წინაშე უთანასწორობა საქართველოს მოქალაქეების ყოველდღიურ რეალობად იქცა. მიკერძოებული გამოძიებისა და საქმის წარმოების პარალელურად, სასამართლოს ვიწრო ჯგუფის ინტერესების სამსახურში ჩაგდომამ და სისტემის რყევამ, მოქალაქეების შორის სასამართლო სისტემისადმი უკიდურესი უნდობლობა, გაუცხოება და წყრომა განაპირობა. ამასთანავე, არაფორმალურმა მმართველობამ მძიმე დაღი დაასვა ხელისუფლების მესამე შტოს - საქართველოს საკანონმდებლო ორგანოს (პარლამენტი), რომელიც ფორმალობისა და წარმოდგენის ამფითეატრად იქცა. არაფორმალური მმართველობის შედეგად, სახელმწიფო ინსტიტუტები ემსახურებიან არა მოქალაქეებს, არამედ ვიწრო პრივილეგირებული ჯგუფის ინტერესებს. ზემოღნიშნული ვითარება მაჩვენებელია ქვეყანაში არსებული დემოკრატიული კრიზისისა, რადგანაც ხდება მოქალაქის სახელმწიფოსაგან გაუცხოება და უკიდურესი იმედგაცრუება. იმედგაცრუების ფონზე შეუძლებელია ქვეყნის წისვლა და მოსახლეობის კეთილდღეობის მიღწევა.

ქვეყანაში არსებული დემოკრატიული კრიზისის შემდგომი გამწვავება გარდაუვალია აღნიშნული სიტუაციიდან გამოსავლის მოძიების გარეშე. ხელისუფლებამ საკუთარი ქმედებების შედეგად, დაკარგა მოსახლეობის ნდობა და შესაბამისად, კრიზისიდან გამოსვლის უზრუნველსაყოფი საშუალებებიც.

ჩვენ გვჯერა, რომ აღნიშნული კრიზისიდან გამოსვლის ერთ-ერთი საშუალება დაინტერესებულ მოსახლეობასთან შეხვედრა-დისკუსიის რეჟიმში იმ უმწვავესი საკითხების განხილვაა, რომელიც ბოლო რამოდენიმე წლის განმავლობაში საქართველოს ყველა მოქალაქის სატკივარი გახდა.

დღეიდან 28 ოქტომბრამდე, ჩვენ გაერთიანებული ოპოზიცია „ძლა აერთობაშია“ - ქვეყნის ანტი-კრიზისული გეგმის შესამუშავებლად, ვიწყებთ ფართო-საზოგადოებრივ დისკუსიას - საქართველო ლიდერთა შორის. აღნიშნული პერიოდის განმავლობაში, ყოველ სამშაბათსა და პარასკევს, გაიმართება შეხვედრა-დისკუსიები შემდეგ თემებზე: სასამართლო რეფორმა (09/10/2018); სამართალდამცავი ორგანოები (12/10/2018); ეკონომიკური პოლიტიკა (16/10/2018); განათლება და სოციალური პოლიტიკა (19/10/2018); ხოლო 23 ოქტომბერს შედგება წინარე შეხვედრების შემაჯამებელი-დასკვნითი შეხვედრა, სადაც მოხდება წინა შეხვედრებზე გაჟღერებული შედეგების პრეზენტაცია“- აღნიშნულია „ძალა ერთობაშიას“ განცხადებაში.