"ეს არის „ნაციონალური მოძრაობის“ კვლევა"- ირაკლი კობახიძე Edison Research-ის წინააღმდეგ

პოლიტიკა - 12:26, 08 Oct, 2018

679

პარლამენტის თავმჯდომარე, რომელიც ირწმუნება, რომ შიდა კვლევებით, სალომე ზურაბიშვილი დამაჯერებლად იგებს საპრეზიდენტო არჩევნებს, არ აკონკრეტებს, ვის დაუკვეთა კვლევა მმართველმა პარტიამ.

კითხვაზე, რატომ არ ასაჯაროვებს „ქართული ოცნება“ შიდა კვლევებს, ირაკლი კობახიძემ განაცხადა, რომ პოლიტიკური პარტია როდესაც შიდა კვლევას ატარებს, ეს არის პარტიის კვლევა და შესაბამისად, მისი საზოგადოებისთვის წარმოჩენა ნიშნავს შიდა სამზარეულოს გარეთ გატანას.

„ეს არის სწორი და ბუნებრივია, ნდობა ვერ იქნება პარტიული კვლევის მიმართ მაღალი, ამიტომ არ არის Edison Research-ის კვლევის მიმართაც მაღალი ნდობა, რადგან ყველამ იცის, ეს არის „ნაციონალური მოძრაობის“ კვლევა. ყველა პარტიამ თავის შიდა კვლევა თავისთვის უნდა შეინახოს. ეს შიდა კვლევები ტარდება იმისთვის, რომ სწორად დავგეგმოთ საარჩევნო კამპანია, სწორად გავაკეთოთ საჯარო განცხადებები. ვიცით, რა შედეგს ველოდებით ამ საპრეზიდენტო არჩევნებისთვის, ვიცით, რომ სალომე ზურაბიშვილი დამაჯერებლად გაიმარჯვებს ამ არჩევნებში, ვიცით, დაახლოებით როგორ გადანაწილდება მეორე-მესამე ადგილები და სერიოზული რისკი აქვს ნიკა გვარამიასა და „ნაციონალური მოძრაობის“ კანდიდატს, რომ ის ვერ გავა საერთოდ მეორე ადგილზე, ეს ქმნის იმ ისტერიულ ფონს, რა ფონზეც გაკეთდა ნიკა გვარამიას განცხადება“, – განაცხადა ირაკლი კობახიძემ.