Edison Research-ის ახალი კვლევა - საპრეზიდენტო კანდიდატებს შორის გრიგოლ ვაშაძე ლიდერობს

პოლიტიკა - 21:49, 07 Oct, 2018

3895

საპრეზიდენტო არჩევნებამდე ერთ თვეზე ნაკლები რჩები, როგორია პოლიტიკური რეიტინგები და მივიღებთ თუ არა გარდაუვალ მეორე ტურს? - მასშტაბური სოციოლოგიური კვლევა უკვე მეორედ, „რუსთავი2“-ის დაკვეთით, საერთაშორისო ორგანიზაცია „Edison Research"-მა ჩაატარა.

25 სექტემბრიდან 4 ოქტომბრის ჩათვლით კომპანიის წარმომადგენლებმა 3 ათასი ადამიანი პირისპირ გამოკითხეს და მათი პასუხები შეაჯამეს. ცდომილების ზღვარი +/-2%-ია.

ახალ კვლევაში ანუ მომდევნო ათი დღის განმავლობაში პასუხები ასე გადანაწილდა.

გრიგოლ ვაშაძის პროცენტული მაჩვენებელი გაიზარდა და 26%-მდე ავიდა. ვაშაძე ერთადერთია, ვისი მხარდამჭერების რიცხვიც გაიზარდა.

დავით ბაქრაძის მონაცემი იმდენად შემცირდა, რომ მან მესამე ადგილზე გადაინაცვლა. წინა კვლევაში 18% ჰქონდა, ახლა კი 12%.

დაიკლო სალომე ზურაბიშვილის მხარდამჭერთა რიცხვმაც 15-დან 14%-მდე.

იგივე მდგომარეობაა შალვა ნათელაშვილის შემთხვევაშიც - ახალ კვლევაში მას 8-ის ნაცვლად 7% უჭერს მხარს.

მოიმატა იმ ადამიანების რაოდენობამაც, რომლებსაც ვერ გადაუწყვეტიათ, ვის მისცენ ხმა ან თავს იკავებენ პასუხისგან - 25%-დან 29%-მდე.

წინა კვლევაში, რომელიც სექტემბრის შუა რიცხვებში ჩატარდა, კითხვაზე ვის მისცემდით ხმას არჩევნები დღეს, რომ იმართებოდეს პასუხები ასე გადანაწილდა:

გრიგოლ ვაშაძე 22%;

დავით ბაქრაძე 18%;

სალომე ზურაბიშვილი 15%;

შალვა ნათელაშვილი 8%.