სალომე ზურაბიშვილი საქართველოში ევროკავშირის ელჩს შეხვდა

პოლიტიკა - 19:46, 05 Oct, 2018

794

დღეს, პრეზიდენტობის კანდიდატი, სალომე ზურაბიშვილი საქართველოში ევროკავშირის ელჩს, კარლ ჰარცელსა და ევროკავშირის წევრი ქვეყნების ელჩებს შეხვდა.
შეხვედრისას, კანდიდატმა ელჩებს წინასაარჩევნო კამპანიის მიმდინარეობა გააცნო.
„მივაწოდე სრული და დეტალური ინფორმაცია იმ საბჭოთა სტილის კამპანიაზე, რომელიც პირადად ჩემს წინააღმდეგ არის მიმართული და გასცდა ყველა ზომასა და ზღვარს. ასევე, წავუკითხე „რუსთავი-2-ის“ გენერალური დირექტორის დღევანდელი პოსტი. ეს არის პირდაპირი მუქარა ყველა იმ ადამიანზე, რომელიც მე დამეხმარება. ვფიქრობ, ყველამ უნდა იცოდეს, როგორ იქცევა ერთ-ერთი ტელეკომპანიის გენერალური დირექტორი საარჩევნო კამპანიის დროს.
გარდა ამისა, ვრცლად ვისაუბრეთ ჩემი კამპანიის თემებზე, როგორი პრეზიდენტი ვიქნები, რა არის პრიორიტეტები: ევროპის შემოყვანა საქართველოში, თავისი ყველანაირი სტანდარტით, საქართველოს ევროპაში ყოფნა და ჩემი, როგორც არამხოლოდ ელჩის, არამედ ლობისტის როლი, რადგან საქართველოს სჭირდება მეტი დანახვა და აქტიურობა ევროპასა და მსოფლიოში.
ეს არის ის, რაც ელჩებს ყველაზე მეტად აინტერესებდათ, რადგან, როგორც მათ თავად აღნიშნეს, წინასაარჩევნო კამპანიის შესახებ ძალიან ცოტა ესმით. ეს არის კამპანია, რომელიც ვითარდება პრაქტიკულად თემების გარეშე“, - განაცხადა სალომე ზურაბიშვილმა.