"ჩანაწერების ნამდვილობა ყიფიანმა დაადასტურა" - ოპოზიცია სამხარაულის ექსპერტიზის დასკვნას არ ენდობა

პოლიტიკა - 15:47, 05 Oct, 2018

1074

ექსპერტიზის ეროვნული ბიუროს დასკვნას, რომლის მიხედვითაც, "ომეგა ჯგუფის" საქმეზე გავრცელებულ ფარული ჩანაწერების ნაწილში წყვეტაა, ოპოზიცია არ ენდობა.

მათი შეფასებით, ჩანაწერების ნამდვილობა საუბრის ერთ-ერთმა ფიგურანტმა, სპორტის ყოფილმა მინისტრმა, ლევან ყიფიანმა დაადასტურა.

"ამ ჩანაწერების ნამდვილობა დაადასტურა იმ ადამიანმა, ვინც მონაწილეობდა საუბრებში, ბატონმა ყიფიანმა და ამიტომ, ამ ვითრებაში ვფიქრობ, რომ არც სამხარაულის ბიუროს გამოძიება, არც რომელიმე სხვა საკუთარი დაქირავებული ექსპერტის მიერ მოცემული ახსნა-განმარტება არ დაეხმარება დღევანდელ ხელისუფლებას იმაში, რომ გადაარწმუნოს საზოგადოება იმაში, რომ ჩვენ საქმე გვაქვს სრულიად კოორდინირებულად წარმართულ სახელმწიფო რეკეტთან „ომეგას“ შემთხვევაში,“- განაცხადა „ნაციონალური მოძრაობის“ წევრმა, სალომე სამადაშვილმა.

ოპოზიციის წარმომადგენლები საქმეში საერთაშორისო გამომძიებლების ჩართვის საჭიროებაზე საუბრობენ.

„ხელისუფლებას არ გააჩნია მწყობრი ხედვა და საერთოდ რას ამტკიცებენ, მიჰყვებიან კლასიკურ რუსული პროპაგანდის პრინციპის, რომ მთავარია ილაპარაკონ, არც არგუმენტს, არც მტკიცებულებას არ აქვს მნიშვნელობა. თუ ჩვენ გვინდა, რომ თავიდან ავირიდოთ ასეთი ფაბრიკაციები, რასაც დღეს პროკურატურა ეწევა, ავირიდოთ შემდგომში პოლიტიკური დევნა, ავირიდოთ თუნდაც, პოლიტიკურ დევნაზე წარმოდგენა ან ეჭვი, საჭიროა, რომ საერთო ნდობის მქონე საერთაშორისო გამომძიებლები მოვიწვიოთ,“- განაცხადა „ევროპული საქართველოს“ წევრმა, ირაკლი კიკნაველიძემ.