"მე მასწავლით, როდის უნდა გიპასუხოთ?" - ზურაბიშვილი სამოქალაქო სექტორს არ პასუხობს

პოლიტიკა - 19:07, 04 Oct, 2018

2311

სალომე ზურაბიშვილი 13 არასამთავრობო ორგანიზაციის მიერ გავრცელებული განცხადების შინაარსს არ იზიარებს. ქართული ოცნების მხარდაჭერილი კანდიდატი ამბობს, რომ ის ქსენოფობიურ განცხადებებს არ აკეთებს.

„რასაც ამბობენ ის წაკითხული მაქვს და თქვენს მიერ გამეორება არ არის საჭირო. თქვენ განცხადებებს აკეთებთ. პასუხს მე გაგცემთ იმ ადგილს, სადაც იქნება საჭირო... მე მასწავლით, როდის უნდა გიპასუხოთ?“ - განაცხადა სალომე ზურაბიშვილმა.

არასამთავრობო ორგანიზაციების შეფასებით, სალომე ზურაბიშვილის განცხადებები ხელს უწყობს შუღლის გაღვივებას, ეწინააღმდეგება ლიბერალური დემოკრატიისა და თანასწორუფლებიანობის პრინციპებს.

მესამე სექტორი წუხს, რომ ზურაბიშვილის განცხადებები არის პოლიტიკურ რეალობაში ისტორიული კონფლიქტის ხელოვნურად შემოტანის მცდელობა.

2 ოქტომბერს, ნინოწმინდაში, წინასარჩევნო კამპანიის ფარგლებში, ადგილობრივ ეთნიკურად სომეხ მოქალაქეებთან შეხვედრისას, ზურაბიშვილმა განაცხადა: “აქამდე მოქალაქეობა იყო მხოლოდ მინიჭებით და მხოლოდ პრეზიდენტის საბოლოო გადაწყვეტილებით და ერთმა პრეზიდენტმა [მიხეილ სააკაშვილი], ძალიან ბევრი მოქალაქეობა დაურიგა თურქებს, დღეს მისი წარმომადგენელი არის ჩემი ოპონენტი, მაგრამ თქვენ არ მოგცათ მოქალაქეობა”.