"ოკუპანტების მიერ მოქალაქეების გატაცება ქართული მხარის გარკვეული ხელშეწყობით ხდება" - არასამთავრობო ორგანიზაციის სკანდალური განცხადება

პოლიტიკა - 15:28, 04 Oct, 2018

1930

წამების მსხვერპლთა რეაბილიტაციის ცენტრი „ემპათია“- (RCT/EMPATHY) საოკუპაციო რეჟიმის მხრიდან გატაცებების გახშირებასთან დაკავშირებით საგანგებო განცხადებას ავრცელებს. ცენტრის ხელმძღვანელის თქმით, მოქალაქეების გატაცებაში საოკუპაციო რეჟიმს ხელს ქართული მხარე უწყობს.

„არაერთი შემთხვევაა, როდესაც გვაქვს ოჯახიდან ინფორმაცია, რომ გარკვეული ხელშეწყობა ქონდა ქართული მხრიდან, ინფორმაცია გადაეცემა საოკუპაციო რეჟიმების ე.წ უშიშროების სამსახურებს და შესაბამისად ინფორმაციის მიმოცვლა აისახება იმაზე თუ ვინ დააკავონ, რატო დააკავონ და რა ზემოქმედება მოახდინონ, ეს ხომ მხოლოდ ფულის გამოძალვის მიზნით არაა, ძირითადი მიზანია, რომ დაშინებული იქნას ეს მოსახლეობა.“- განაცხადა ჯიშკარიანმა.

რეაბილიტაციის ცენტრი „ემპათია“-ს განცხადებით საოკუპაციო რეჟიმის მხრიდან გატაცებებისა და არაადამიანური მოპყრობის ფაქტების გახშირება, განსაკუთრებით კი, წინასაარჩევნო პერიოდში, ემსახურება მოსახლეობაში შიშისა და ნიჰილიზმის დანერგვას:

„საოკუპაციო რეჟიმის მხრიდან გატაცებებისა და არაადამიანური მოპყრობის ფაქტების გახშირება, განსაკუთრებით კი, წინასაარჩევნო პერიოდში, ნათლად ემსახურება მოსახლეობაში შიშისა და ნიჰილიზმის დანერგვას, რაც ჩვენს მიერ არაერთგზის განმარტებული „სტოკჰოლმის" სინდრომის გამყარებას უწყობს ხელს.

აღნიშნული გააქტიურება მიმართულია სისხლის სამართლის საერთაშორისო სასამართლოს მიერ არსებულ გამოძიებაზე ნეგატიური გავლენის მოსახდენად და „ომი ჩვენ დავიწყეთ" მოსაზრებისა თუ შეგნებული მავნებლობის მხარდასაჭერად.

სამწუხაროდ, ხელისუფლება მოკლებულია ქმედითი ზომების მიღების უნარს, შესაბამისად, ცენტრი „ემპათია" იწყებს საზოგადოებრივ კონსულტაციებს არასამთავრობო სექტორის, ექსპერტებისა და სტუდენტების ფართო ჩართულობით მცოცავი და განგრძობითი რუსული ოკუპაციის შეჩერების საკითხებზე.“- ნათქვამია „ემპათიის“ განცხადებაში.