"მოვუწოდებთ რუსეთს გაიყვანოს სამხედრო ძალები საქართველოდან" - NATO-ს გენმდივანი საქართველოს მოქალაქის გატაცებას გამოეხმაურა

პოლიტიკა - 10:22, 04 Oct, 2018

1249

ჩრდილო ატლანტიკური ალიანსის გენერალური მდივანი ნატო-საქართველოს კომისიის სხდომის შემდეგ გამართულ პრესკონფერენციაზე, საქართველოს ოკუპირებულ ტერიტორიებზე შექმნილ ვითარებას და საოკუპაციო რეჟიმის მიერ მოქალაქეების გატაცებას გამოეხმაურა. იენს სტოლტენბერგმა რუსეთს კიდევ ერთხელ მოუწოდა გაიყვანოს ჯარები საქართველოს რეგიონებიდან და უარი თქვას აფხაზეთისა და სამხრეთ ოსეთის დამოუკიდებლობის აღიარებაზე. ალიანსის მეთაურის თქმით, ოკუპირებულ ტერიტორიებზე არსებული გამწვევების და პრობლემების ერთ-ერთი მთავარი მიზეზი, იქ სამხედრო ძალის ყოფნაა:

„ნატოს კარი ღიაა. ლიდერებმა ივლისში გამოხატეს ერთგულება 2008 წელს მიღებული გადაწყვეტილების მიმართ, რომ საქართველო გახდება ნატოს წევრი. დღეს ნატოს წევრებმა დააფიქსირეს მხარდაჭერა საქართველოს ტერიტორიული მთლიანობისა და სუვერენიტეტის მიმართ. ჩვენ მოვუწოდებთ რუსეთს, რომ შეწყვიტოს სამხრეთ ოსეთისა და აფხაზეთის დამოუკიდებელ სახელმწიფოებად აღიარება, რადგან ეს ორივე რეგიონი საქართველოს ნაწილია.

მოვუწოდებთ რუსეთს გაიყვანოს თავისი სამხედრო ძალები საქართველოს რეგიონებიდან. შეშფოთებულები ვართ შავი ზღვის რეგიონში რუსეთის სამხედრო წარმომადგენლობის ზრდით. შავი ზღვის უსაფრთხოება პრიორიტეტულია ნატო-სთვის და პრიორიტეტულია საქართველოსთვის. ჩვენ ვმუშაობთ ისე მჭიდროდ, როგორც არასდროს.“- განაცხადა იენს სტოლტენბერგმა.