ოკუპირებული ცხინვალის იზოლატორში მყოფი მაია ოთინაშვილის დედის, გალინა ქელეხსაევას ინფორმაციით, მისი შვილი ნაცემია.

როგორც გალინა ქელეხსაევამ "რადიო თავისუფლებას" განუცხადა, მისმა შვილმა საოკუპაციო ძალების წარმომადგენლებს წინააღმდეგობა დაკავებისას გაუწია, რის გამოც სცემეს. დაკავებულის დედა ვარაუდობს, რომ მაია ოთინაშვილს ფიზიკური შეურაცხყოფა მიაყენეს ცხინვალში გადაყვანის შემდეგაც.

"სწორედ ამის გამოა, რომ ცხინვალის იზოლატორში მაიას ნახვის უფლებას არ გვაძლევენ და პატიმრობიდან გათავისუფლებასაც იმიტომ აჭიანურებენ, რომ ძალადობის კვალი წაიშალოს", – განაცხადა გალინა ქელეხსაევამ.

გალინა ქელეხსაევა „წითელი ჯვრის“ კომიტეტის წარმომადგენლებს თხოვნით მიმართავს, რომ მისი იზოლატორში მყოფი მაიას ნახვა მოახერხონ.

„მთელი პროცედურაა გასავლელი, რომ შესვლის უფლება მოვიპოვოთ. პროცესში ჩართული ვართ, ვაცნობეთ ცხინვალს, მაგრამ ჯერ–ჯერობით პროგრესი არ არის“, - განუცხადა "წითელი ჯვრის“ წარმომადგენელმა მაია ქარდავამ "რადიო თავისუფლებას".

შეგახსენებთ, რომ ოკუპანტებმა 37 წლის მაია ოთინაშვილი 29 სექტემბერს გორის მუნიციპალიტეტის სოფელ ხურვალეთთან გაიტაცეს.