ახალქალაქში სალომე ზურაბიშვილის მიერ გაკეთებული განცხადებების გამო უმრავლესობა ისევ თვის მართლების რეჟიმშია. „ოცნების“ წარმომადგენლები ამბობენ, რომ ზურაბიშვილს განსაკუთღებული არაფერი უთქვამს. მეტიც, ისინი ეთანხმებიან ზურაბიშვილის მოსაზრებას, რომ წინა ხელისუფლების დროს პრეზიდენტი სააკაშვილი მხოლოდ თურქეთიდან გადმოსულ მოქალაქეებს ანიჭებდა ორმაგ მოქალაქეობას.

„ფაქტი ერთი არის მართლა ის, რაც საზოგადოებას ახსოვს, ბოლო პერიოდში მიხეილ სააკაშვილის პრეზიდენტად ყოფნის, რომ ძალიან ბევრი ასე ვთქვათ მოქალაქეობა იქნა თვითონ მიხეილ სააკაშვილის მხრიდან დარიგებული, ოღონდ რა დამსახურებებით ეს არავინ არ იცის. ძალიან ბევრი ადამიანი, რომელიც მანამდე არ იყო საქართველოს მოქალაქე, სწორედ მიხეილ სააკაშვილის პრეზიდენტობის ბოლო რამდენიმე თვის განმავლობაში გახდა საქართველოს მოქალაქე და ამაზე არავის არ უთქვამს ახსნა, თუ რატომ მოხდა ასეთი მასიური დარიგება საქართველოს მოქალაქეობის. ალბათ, სწორედ ეს იგულისხმა სალომე ზურაბიშვილმა და მეტი არაფერი,“- განაცხადა დავით მათიკაშვილმა.

დიმიტრი ცქიტიშვილის თქმით, ზურაბიშვილის განცხადების კონტექსტი არ იცის, თუმცა მიაჩნია, რომ პრეზიდენტობის კანდიდატს ეთნიკური შუღლის გაღვივება არ სურს.

„მე არ ვიცი კონკრეტულად ამ განცხადების კონტექსტი, სად იყო გაკეთებული და ამიტომ ზუსტად ვერ გეტყვით. არა მგონია, რომ სალომე ზურაბიშვილს რამე განწყობა ჰქონდეს, რომ ეთნიკური შუღლი გააღვივოს ქვეყანაში, არა მგონია. მით უმეტეს საქართველოს მოქალაქეობის მიცემაზეა საუბარი და არა წართმევაზე,“- განაცხადა დიმიტრი ცქიტიშვილმა.

„ქართული ოცნების“ მიერ მხარდაჭერილმა საპრეზიდენტო კანდიდატმა ეთნიკურ სომხებთან შეხვედრის დროს მიხეილ სააკაშვილი, თურქი ეროვნების მოსახლეობის მიმართ პრივილეგიების მინიჭებაში დაადანაშაულა.