შუახევის ოლქის 48-ე საარჩევნო უბანზე კომისიის თავმჯდომარის მოადგილე და მდივანი კანონდარღვევით აირჩიეს - ამის შესახებ ინფორმაციას გაერთიანებული ოპოზიცია „ძალა ერთობაშია“ ავრცელებს. დღეს გამართულ ბრიფინგზე ლევან ბეჟაშვილმა განაცხადა, რომ არსებული ინფორმაციით, ხმაურიანი სხდომის პროცესში „ქართული ოცნების“ ოფისიდან დარეკეს და მისცეს მითითება, თუ ვინ უნდა აერჩიათ ამ თანამდებობაზე. ბეჯაშვილმა ცენტრალური საარჩევნო კომისია გულგრილობაში დაადანაშაულა:

„ცენტრალური საარჩევნო კომისია აბსოლუტური გულგრილობით, დანაშაულებრივი გულგრილობით თვალ-ყურს ადევნებს თუ როგორ აკომპლექტებს „ქართული ოცნების“ ადგილობრივი შტაბები საუბნო საარჩევნო კომისიებს და ცენტრალური საარჩევნო კომისია არანაირ რეაგირებას არ ახდენს ასეთ უმსგავსო კანონდარღვევის ფაქტებთან დაკავშირებით. ცენტრალური საარჩევნო კომისია ამ არჩევნებთან დაკავშირებით არაფერ შუაში აღარაა. მას მიშვებული აქვს ყველა პროცესი ადგილებზე და პრაქტიკულად, „ქართული ოცნების“ ადგილობრივი შტაბები აკომპლექტებენ საუბნო საარჩევნო კომისიას. ცენტრალური საარჩევნო კომისია არანაირ პასუხისგებას არ იღებს ამ საკითხთან დაკავშირებით. არის მხოლოდ დუმილი, დანაშაულებრივი გულგრილობა და რა ობიექტურ, რა სამართლიან არჩევნებზე შეიძლება იყოს საუბარი ასეთ პირობებში,“- განაცხადა ლევან ბეჟაშვილმა.