სკანდალური ჩანაწერები და „ომეგას“ საქმე - გიორგი გახარიასა და შალვა თადუმაძეს პარლამენტში იბარებენ

პოზიცია - 12:40, 03 Oct, 2018

1875

„ომეგა ჯგუფის“ საქმესა და სკანდალურ ჩანაწერებს, სადაც ბიძინა ივანიშვილის მმართველობის ძალადობრივი მეთოდები იკვეთება, პარლამენტში განხილვის მთავარი თემა იქნება - დეპუტატები განცხადებებს სახელმწიფო რეკეტზე გააკეთებენ.

„100% დადასტურებული ფაქტია, ბანკიდან გამოიტანეს 4 მილიონი ლარი, ჩადეს ტომარაში, ჩაუდეს მანქანაში ვიღაც ბანდიტებს, არის საბუთი, არის მტკიცებულება ფულის გამოძალვის ფაქტზე აღიძრა სისხლის სამართლის საქმე, ეს არის მაფიოზური ჯგუფის მიერ დატერორება კონკრეტული ბიზნესის. ამ ისტორიას ვერ წაშლის ხელისუფლება, იმიტომ, რომ საბანკო ჩანაწერები შეუძლებელია გაქრეს, ამიტომ დაუყოვნებლივ უნდა გამოცხადდეს პროკურორი და შს მინისტრი, ყველა პირი, რომელიც ჩართულია, მოვიდეს პარლამენტში და კითხვებს პასუხები გასცეს,“ - ამბობს რომან გოცირიძე.

„როდესაც ვსაუბრობთ სისტემურ კორუფციაზე, რა თქმა უნდა, პარლამენტში პასუხი უნდა გაეცეს იმ შეკითხვებს, რომელიც საზოგადოებას აქვს,“- აცხადებს „ევროპული საქართველოს“ წევრი ირაკლი აბესაძე.

გიორგი გახარია, სკანდალური ჩანაწერების ერთ-ერთი ფიგურანტია, რომელიც ზაზა ოქუაშვილის განცხადებით, ბიძინა ივანიშვილთან გამართულ შეხვედრას, ბიზნეს ომბუდსმენის სტატუსით ესწრებოდა.