24-საათიან რეჟიმში ვმუშაობთ, რათა ჩვენი მოქალაქე დაუბრუნდეს თავის შვილებს და თავის ოჯახს - პრემიერი ოკუპანტების მიერ გატაცებულ მაია ოთინაშვილზე

პოლიტიკა - 11:10, 03 Oct, 2018

645

საქართველოს პრემიერ-მინისტრის მამუკა ბახტაძის თქმით, მთავრობა ყველაფერს აკეთებს იმისთვის, რომ ხურვალეთთან ე.წ. მესაზღვრეების მიერ დაკავებულ 37 წლის მაია ოთინაშვილი ოჯახს დაუბრუნდეს.

„სამწუხაროდ საოკუპაციო რეჟიმი განაგრძობს თავის აგრესიულ პოლიტიკას და ადამიანის უფლებების ფეხქვეშ გათელვას. ჩვენ ჩვენს პარტნიორებთან ერთად და ამ შემთხვევაში მინდა ხაზი გავუსვა, ვცდილობთ რომ გვქონდეს მექანიზმები და ეს მექანიზმები ხშირ შემთხვევაში არის ძალიან ეფექტური, რომ მოვახდინოთ პრევენცია მსგავსი შემთხვევების.

24-საათიან რეჟიმში მუშაობს ქეთევან ციხელაშვილის აპარატი, ისევე როგორც შესაბამისი ორგანოები და რაც მთავარია ევროკავშირის სადამკვირვებლო მისია, რომ უახლოეს საათებში ჩვენი მოქალაქე დაუბრუნდეს თავის შვილებს და თავის ოჯახს.

ძალიან მძიმე შემთხვევას აქვს ადგილი, ამასაც მინდა ხაზი გავუსვა, შესაბამისად ჩვენ მოვახდინეთ ყველა რესურსის მობილიზაცია, მათ შორის საერთაშორისო თანამეგობრობის, რომ ჩვენი მოქალაქე რაც შეიძლება მალე დაუბრუნდეს თავის ოჯახს“, - განაცხადა მამუკა ბახტაძემ.