ფინანსთა სამინისტროსთან „ომეგა ჯგუფისა“ და ტელეკომპანია „იბერიას“ თანამშრომლები აქციას მართავენ.

აქციაზე გაერთიანებული ოპოზიციის ლიდერები გრიგოლ ვაშაძე, ზაალ უდუმაშვილი და ნიკა მაჭუტაძე მივიდნენ.

ტელეკომპანია „იბერიის“ დამფუძნებლისა და „ომეგა ჯგუფის“ ერთ-ერთი მფლობელის, ნატო ჩხეიძის განცხადებით, კომპანიის მოთხოვნა არ არის ვალის ჩამოწერა, მათი მოთხოვნაა, რესტრუქტურიზაციის გეგმის მიღება და ვალის შესაბამისად გადახდა.

„დღევანდელი აქცია ორგანიზებულია „ომეგა ჯგუფის“ თანამშრომლების მიერ. მათ სურთ, ამუშავდეს ფაბრიკა. ამისთვის საჭიროა ერთადერთი რამ, რომ ფინანსთა სამინისტრომ გასცეს აქციზური მარკები. დასაქმებულ ადამიანებს სურთ, რომ იმუშაონ და მიიღონ ანაზღაურება ისე, როგორც ეს ხდებოდა სამი თვის წინ“,- განაცხადა ნატო ჩხეიძემ.