საკრებულოში “ერთიანი ნაციონალური მოძრაობის” დეპუტატმა ლევან ხაბეიშვილი თბილისის მერიის ინიციატივას ეხმაურება, რომლის ტანახმადაც ლიცენზირებულ ტაქსის მძღოლებს ვაუჩერები გადაეცემათ, რომლითაც ისინი მანქანების უფასოდ გადაღებვას შეძლებენ:

“სამწუხაროდ, დედაქალაქის მერი გადავიდა ბოდვაზე და დღეს დედაქალაქის მთავრობის სხდომაზე ჩვეულებრივად იბოდიალა პირდაპირი მნიშვნელობით და თქვა, რომ ტაქსის მძღოლებს ვაუჩერებს დავურიგებთ, თუმცა არა ბიუჯეტის ხარჯით, არამედ, კომპანიებს სარეკლამო ხარჯით შევაღებინებთ ტაქსებსო. უკაცრავად, თუ ვინმე მეტყვით, რომ 20 მილიონიდან 30 მილიონ ლარამდე რომელიმე კომპანია ტაქსზე “მიტყეპებულ” რეკლამაში გადაიხდის, მაშინ ვიტყვი, რომ დედაქალაქის მერი არის ადეკვატური. მისი დღევანდელი განცხადება იყო არასერიოზული და დედაქალაქის მერს ურჩევნია, სერიოზული განცხადებები აკეთოს. „ტაქსისტებს“ რომ დაავალეს 1500-2000 ლარის ხარჯის გაღება, რაც ავტომობილების გადაღებვას გულისხმობს, გამოიწვია სერიოზული უკმაყოფილება. მათ ნახეს, რომ აქვთ არჩევნები, ისედაც მათი კანდიდატის რეიტინგს პულსი არ ესინჯება, ამიტომ მიხვდნენ, რომ ის აგიტატორები, რომლებმაც ეს ხალხი მთავრობაში მოიყვანა, ძალიან ცუდ სამსახურს გაუწევდნენ. ასევე, გადაღებვის გარდა, ფარატინა ფურცელი, რომელსაც მძღოლები ლიცენზიის სახით იღებენ, არის ერთი თეთრის ღირებულების და ამაში გადაახდევინეს 110 ლარი. ასეთი ბოდვებით არის დაკავებული დედაქალაქის მერი სამწუხაროდ. დედაქალაქის მერი ბოდავს რამდენიმე მიზეზის გამო. ამას თუ ქალაქის ბიუჯეტი გააკეთებს, რა თქმა უნდა, ეს წარმოუდგენია, რატომ უნდა გადაიხადოს დედაქალაქის ბიუჯეტმა 20-30 მილიონი ლარი ტაქსის გადაღებვაში, ეს ნონსენსია; მეორე - თურმე ამას გააკეთებენ ტენდერით. კომპანიები შეღებავენ იმიტომ, რომ რეკლამა „მიატყეპონ” ტაქსზე. გინახავთ კომპანია, რომელიც 15-20 მილიონს იხდის, რომ ტაქსზე რეკლამა „მიატყეპოს“? ასეთი რამ არ არსებობს, 15-20 მილიონად მთელი საქართველოს ბანერებს შეიძენენ, საკუთარ ტელევიზიას გახსნიან, სადაც თავიანთ კომპანიას რეკლამას გაუკეთებენ - სრული იდიოტიზმია. ეს ერთადერთი რამის გამო თქვეს, ამას მარტივი მიზანი აქვს, საარჩევნოდ ხმები არ დაკარგოს მათმა კანდიდატმა და ეს არის სალომე ზურაბიშვილი”, - განაცხადა ლევან ხაბეიშვილმა.