„ქართული ოცნების“ ოფისთან ხორავას ქუჩაზე მოკლული არასრულწლოვნის მამა, ზაზა სარალიძე მივიდა.

ზაზა სარალიძე პოლიციას სთხოვდა, რომ „ქართული ოცნების“ ოფისში შეეშვათ, რათა მმართველი გუნდის წევრებს შეხვედროდა, თუმცა ოფისისკენ მიმავალ ზაზა სარალიძეს გზა პოლიციამ გადაუკეტა.

„მაცნობეს, რომ კახა კალაძეს გაუკეთებია განცხადება, ნაციონალების მიერ არის მოწყობილი პროვოკაციაო. უნამუსობაა ეს. ამდენი შვილის მამაა, უნამუსოდ რატომ იქცევიან, უნამუსო განაცხადებს რატომ აკეთებენ, ვერ ვხვდები. არ მაქვს ჩემი მოკლული შვილის მკვლელების დასჯის მოთხოვნის უფლება? რა შუაშია აქ „ნაციონალური მოძრაობა“, რა შუაშია „ლეიბორისტები“ და „გირჩი“. ნებისმიერთან მივალ დახმარების სათხოვნელად. ფაქტია, გზას მიკეტავენ. განმარტებას ვერაფერზე ვიღებ, რა ბრძანება აქვთ, ისიც არ ვიცი. იციან, რომ პოლიციელებს წინააღმდეგობას არ გავუწევ და გზას მიკეტავენ. გამოძიებულია საქმე თავიდან ბოლომდე, კეთილი უნდა ინებონ გენერალურმა პროკურორმა და შს მინისტრმა, მისცენ პასუხისგებაში არა მარტო მკვლელები, არამედ საქმის გამფუჭებელი პროკურორები და ყველა ის პირი, ვინც ოდნავ გაეკარა ჩემი შვილის საქმეს“, - განაცხადა ზაზა სარალიძემ.

სარალიძის თქმით, მას ხელისუფლების წარმომადგენლებთან, ასევე პრეზიდენტობის კანდიდატთან შეხვედრა და მისი შვილის მკვლელობის საქმის გამოძიებასთან დაკავშირებით საუბარი სურს.