პრეზიდენტობის დამოუკიდებელმა კანდიდატმა, სალომე ზურაბიშვილმა, რომელსაც მმართველი გუნდი მხარს უჭერს, გუშინ განაცხადა, რომ მას სურს დებატების გამართვისა გრიგოლ ვაშაძესა და დავით ბაქრაძესთან.

„ევროპული საქართველოს“ საპრეზიდენტო კანდიდატი დავით ბაქრაძე დებატებისთვის მზადყოფნას გამოთქვამს:

„რა თქმა უნდა, საპრეზიდენტო კანდიდატების დებატები უნდა გაიმართოს ნებისმიერ შემთხვევაში. ამიტომ ჩემთვის ცოტა გაუგებარია, რა ინიციატივით გამოდის და რითი გვემუქრება ქალბატონი ზურაბიშვილი. უფრო მეტსაც გეტყვით, დებატები უნდა გაიმართოს არამხოლოდ რაღაც მითიურ ნეიტრალურ ტერიტორიაზე, არამედ ყველა იმ არხზე, რომელიც მზად იქნება, უმასპინძლოს დებატებს. დებატისთვის მზად ვართ, არანაირი არავის გამოწვევა არ მჭირდება, დიდი ინტერესით ველოდები ამ დებატს და დარწმუნებული ვარ, ამ დებატის შემდეგ ჩვენი საზოგადოება კიდევ ერთხელ დარწმუნდება, რამდენად მართალია, როდესაც არ აპირებს, ქალბატონ ზურაბიშვილს მხარი დაუჭიროს“, – განაცხადა დავით ბაქრაძემ.