რუსეთის საგარეო უწყება : იმედს ვიტოვებთ, რომ ქართველი პოლიტიკოსები, პროპაგანდისტული დავალებებისგან თავისუფალ დროს მაინც აცნობიერებენ რეალურ ვითარებას

პოლიტიკა - 19:29, 28 Sep, 2018

1343

გაეროს გენერალური ასამბლეის 73-ე სესიაზე საქართველოს პრემიერ-მინისტრის გამოსვლას და გაეროს ტრიბუნაზე საქართველოს ოკუპირებულ ტერიტორიებთან დაკავშირებით მამუკა ბახტაძის მიერ გაკეთებულ განცხადებებს რუსეთის საგარეო საქმეთა სამინისტრო განცხადებით ეხმაურება.

ლავროვის უწყება ბახტაძის მიერ გაჟღერებულ სამშვიდობო ინიციატივებს საერთაშორისო თანამეგობრობისთვის განსაზღვრულ პროპაგანდას უწოდებს და ოკუპირებულ ტერიტორიებზე შექმნილ ვითარებაში „რუსი ოკუპანტების“ ბრალეულობას საერთოდ გამორიცხავს:

„ყურადღება ვამახვილებთ გაეროს გენერალურ ასამბლეაზე საქართველოს მთავრობის მეთაურის, მამუკა ბახტაძის გამოსვლაზე, რომელშიც მან რუსეთს მოუწოდა, ხელი არ შეუშალოს რაღაც „ახალი სამშვიდობო ინიციატივის“ განხორციელებას აფხაზეთთან და სამხრეთ ოსეთთან მიმართებაში.

გამოსვლამ უცნაური განცდა დატოვა. როგორც ვხედავთ, აგრძელებენ მსოფლიო თანამეგობრობის შთაგონებას რეალობისგან ძალიან შორს მდგარი წარმოდგენებით, რომ რესპუბლიკის მოსახლეობა დიდი ხნის წინ დაბრუნდებოდა საქართველოს შემადგენლობაში, რომ არა „რუსი ოკუპანტები“.

იმედს ვიტოვებთ, რომ ქართველი პოლიტიკოსები, პროპაგანდისტული დავალებებისგან თავისუფალ დროს მაინც აცნობიერებენ რეალურ ვითარებას.

თბილისის „სამშვიდობო ინიციატივების“ ბედი განისაზღვრება, არა მათზე მოსკოვის დამოკიდებულებით, არამედ მხოლოდ იმით, თუ როგორ აღიქმება ის სოხუმსა და ცხინვალში. როგორც ცნობილია, რუსეთი დიდი ხანია მოუწოდებს საქართველოს დაიწყოს უეთიერთპატივისცემაზე აგებული დიალოგი აფხაზეთთან და სამხრეთ ოსეთთან. კარგი იქნებოდა, ქართულ მხარეს თავის წინადადებებზე ესაუბრა ჟენევის დისკუსიების ფარგლებში, სადაც განსხვავებით გაეროსგან ამ რესპუბლიკების წარმომადგენლები ესწრებიან. ამ დრომდე თბილისი ამ შესაძლებლობას უგულვებელყოფს.“- ნათქვამია რუსეთის საგარეო უწყების განცხადებაში.