შაშკინი ზურაბიშვილს: "ევროპელობა არაა, როცა ბიზნესს ატერორებ და გაყიდული სიგარეტიდან პარტიაში თანხის ჩარიცხვას აიძულებ, როცა პოლიტპატიმრები გყავს და პრეზიდენტს მოქალაქეობას ართმევ"

პოლიტიკა - 17:58, 28 Sep, 2018

2968

თავდაცვის ყოფილი მინისტრი დიმიტრი შაშკინი სამარცხვინოს უწოდებს „ქართული ოცნების“ მიერ მხარდაჭერილი საპრეზიდენტო კანდიდატის მიერ გაკეთებულ განცხადებას, რომლის თანახმადაც სალომე ზურაბიშვილმა „ეუთო-ს სადამკვირვებლო მისიის ხელმძღვანელს უთხრა, როგორ არაევროპულად იქცევიან მისი ოპონენტები“.

შაშკინი თვლის, რომ სალომე ზურაბიშვილი ვირტუალურ საქართველოში ცხოვრობს და ევროპელობა ჰქონია ის, რომ მის მიერ გაკეთებულ ანტისახელმწიფოებრივ განცხადებებზე საზოგადოებამ და მათ შორის პოლიტიკურმა ოპონენტებმა ტაში დაუკრან.

ყოფილი მაღალჩინოსანი მმართველი პარტიის მიერ მხარდაჭერილ საპრეზიდენტო კანდიდატს ახსენებს იმ რეალობას, რომელშიც შაშკინის შეფასებით ივანიშვილის ხელისუფლებამ საქართველო ჩააგდო.

"სამარცხვინოა, როცა "ქართული ოცნების" საპრეზიდენტო კანდიდატი საუბრობს ევროპულ არჩევნებზე და ამას საუბრობს სადამკვირვებლო მისიის ხელმძღვანელთან. სალომე ზურაბიშვილი წუხს, რომ თურმე მას არა ევროპულად ექცევიან. მგონი, ქალბატონ სალომეს ავიწყდება, რომ ევროპულ სახელმწიფოებში, ამჟამინდელი საქართველოსგან განსხვავებით, მთავარი ოპოზიციური მოძრაობის ლიდერს მოქალაქეობას არ ართმევენ და ყველაფერს არ აკეთებენ, რომ ეს ადამიანი ქვეყანაში არ შემოუშვან. სამწუხაროდ, "ქართული ოცნების" მმართველობის პერიოდის საქართველოში აბსოლუტურად სხვა ვითარებაა. როგორც ჩანს, ქალბატონი სალომე ვირტუალურ საქართველოში ცხოვრობს, რეალობა კი არის ის, რომ ყოფილ პრემიერ-მინისტრს, რომლის ჯანმრთელობის მდგომარეობა უკიდურესად მძიმეა, ციხიდან არ უშვებენ, მაშინ, როცა ყველაზე მაღალი ინსტანციის ევროპულმა სასამართლომ მისი უდანაშაულობა დაადგინა. რეალურ საქართველოში, ვირტუალურისგან განსხვავებით, სუს-ი ებრძვის ოპოზიციურ პარტიებს, ნაცვლად იმისა, რომ ებრძოლოს რუსულ პროპაგანდას. რეალურ საქართველოში არჩევნებზე ადამიანების ხმებს 20 ლარად ყიდულობენ. ევროპულ ქვეყნებში ბიზნესმენებს არ აიძულებენ, ყოველი გაყიდული სიგარეტის კოლოფიდან თანხა მმართველ პარტიას გადაურიცხონ, რისი მომსწრეები ჩვენ ქართული ოცნების პირობებში სულ ახლახან გავხდით. ამ ყველაფრის ფონზე კი ძალიან ამაზრზენი და ცინიკურია, "ქართული ოცნების" საპრეზიდენტო კანდიდატის განცხადება, რომ თურმე საქართველოში მას არაევროპულად ექცევიან. სავარაუდოდ ქალბატონ კანდიდატს ჰგონია, რომ ევროპული იქნება კამპანია, თუ მას ყველა ტაშს დაუკრავს, როცა ის იტყვის, რომ აფხაზეთი საქართველოს განგრენაა და 2008 წელს მშვიდობიანი მოსახლეობა ცხინვალში საქართველომ დაბომბა. "ოცნების" საპრეზიდენტო კანდიდატი ასეთ კამპანიას ვერ ეღირსება, რადგან აფხაზეთი არ არის ჩვენი ქვეყნის განგრენა, ჩვენ ომი არ დაგვიწყია და ყველამ კარგად ვიცით, რომ რუსეთი თავს დაგვესხა, ისეთი მეხუთე კოლონის მხარდაჭერით, როგორიც სალომე ზურაბიშვილია"- განაცხადა დიმიტრი შაშკინმა.