"ფარისევლური მოწოდებები „ძმების“ მიმართ" - აფხაზეთის საოკუპაციო რეჟიმი მამუკა ბახტაძის გაეროში გამოსვლას ეხმაურება

პოლიტიკა - 15:30, 28 Sep, 2018

2295

აფხაზეთის საოკუპაციო რეჟიმის დე ფაქტო საგარეო სამინისტრო გაეროს გენერალური ასამბლეის 73-ე სესიაზე საქართველოს პრემიერ-მინისტრის მამუკა ბახტაძის გამოსვლას ეხმაურება. დე ფაქტო უწყების განცხადებას „ნიუპოსტი“ უცვლელად გთავაზობთ:

„გაეროს გენერალურ ასამბლეის 73-ე სესიაზე გამოსვლისას საქართველოს პრემიერ-მინისტრმა „აფხაზეთის და სამხრეთ ოსეთის მაცხოვრებლებს“ მიმართა და განაცხადა, რომ საქართველოს მომავალი მათთან ერთადაა. „ჩვენ ვხედავთ ჩვენს მომავალს თქვენთან ერთად. თქვენ უნდა გამოიყენოთ ყველა ის სარგებელი, რაც საქართველოს მოქალაქეებს აქვთ.“- განაცხადა ბახტაძემ.

საერთაშორისო საზოგადოებას კიდევ ერთხელ მოუწია მოესმინა საქართველოს წარმომადგებლების ფარისევლური მოწოდებები „ძმების“ მიმართ, რომელთანაც თბილისი აპირებს საერთო მომავალი ააშენოს და მითიური სარგებელი გადაუნაწილოს.

საქართველოს ხელისუფლების წარმომადგენლები უკვე მერამდენედ, საერთაშორისო ტრიბუნის გამოყენებით, საკუთარ თავს ატყუებენ და ცდილობენ დაარწმუნონ აუდიტორიაც და საკუთარი თავიც საქართველოსა და აფხაზეთის „საერთო მომავლის“ შესაძლებლობაში. ამავე დროს ისინი ჯიუტად არ იმჩნევენ, რომ მათი „თანამოქალაქეები“ უკვე 25 წელია სუვერებული სახელმწიფოს- აფხაზეთის რესპუბლიკის მოქალაქეები არიან, რომელთანაც საქართველოს არანაირი ურთიერთობა არ აქვს.

თუ რიტორიკას გვერდით გადავდებთ და ფაქტებს მივმართავთ, ცხადი გახდება, რომ საქართველოს ურთიერთობა „ძმებთან“ პრაქტიკაში გამოიხატება აფხაზეთის მოქალაქეების საერთაშორისო იზოლაციაში, ჰუმანიტარული უფლებების დარღვევაში და გადაადგილებისთვის ხელოვნური ბარიერების შექმნაში.

სწორედ ამ მიმართულებით თბილისის ქმედებებზე უნდა გაამახვილონ ყურადღება საერთაშორისო მედიატორებმა და საერთაშორისო ორგანიზაციების წარმომადგენლებმა.

საქართველოში უნდა შეწყვიტონ ილუზიები, რომ საეჭვო სამშვიდობო ინიციატივებით დახმარებით შესაძლებელი იქნება განახლებული ქართული სსრ-ის შექმნა. აუცილებელია მოხდეს გაცნობიერება, რომ ისტორიის შეცვლა შეუძლებელია და დაიწყოს თავისი პოლიტიკის ჩამოყალიბება აფხაზეთის რესპუბლიკასთან, არსებული პოლიტიკური რეალობის გათვალისწინებით.“- ნათქვამია დე ფაქტო უწყების განცხადებაში.